विराटनगर । मोरङ क्षेत्र नम्बर ४ का प्रतिनिधिसभा सदस्य उम्मेदवार अमनलाल मोदीको घरदैलो अभियानमा नेपाली काङ्ग्रेसका नेता महेश आचार्य हिँडेका छन् ।

प्रतिनिधिसभाका उम्मेदवार मोदी, प्रदेशसभा १ मा गुरुराज घिमिरे र २ मा भीम पराजुलीको घरदैलो अभियानमा आचार्यले मत माग्दै उम्मेदवारहरूसँग हिँड्न थालेका हुन् ।

२०७४ सालमा अमनलाल मोदीसँग पराजित भएका पूर्व मन्त्री आचार्य मोरङ क्षेत्र नम्बर ४ बाट प्रतिनिधिसभा सदस्य टिकटको दाबेदार थिए । तर सत्तारुढ गठबन्धनमा भागबन्डा हुँदा मोरङ क्षेत्र नम्बर ४ माओवादी केन्द्रले पायो ।

माओवादी केन्द्रले टिकट पाएपछि आचार्य चुनावी सभाहरूमा देखिएका थिएनन् । बिहीबारबाट उनी चुनावी अभियानमा हिँडेका हुन् । विराटनगर ८ मा आयोजित चुनावी सभालाई सम्बोधन गर्दै उनले लोकतन्त्र र संविधानको रक्षाका लागि गठबन्धनका उम्मेदवारलाई विजयी गराउन आग्रह गरे । यस क्षेत्रको विकास प्रेमी नेता मोदी भएकोले उनीसहित गठबन्धनको उम्मेदवारलाई अत्यधिक मत दिएर विजय गराउनुपर्ने बताए ।

मोरङ क्षेत्र नम्बर ४ मा एमालेबाट उम्मेदवार बनेका विनोद ढकालले पनि घरदैलो अभियान तीव्र बनाएका छन् ।