विराटनगर । मोरङको सुनवर्षी नगरपालिका – ४ बटरबारीका एक जना धामीको हत्या भएको छ । ३२ वर्षीय अशोक कुमार यादवको हत्या भएको हो ।

हत्या गरिएको अवस्थामा शुक्रबार विहान सुनवर्षी नगरपालिका ४ बटरवारी जाने भित्री सड्क खण्डमा शव भेटिएको छ । शव भेटिएको स्थान घरदेखि करिब एक किलोमिटर पश्चिममा पर्दछ । दुई वर्ष अगाडीदेखि यादवले धामी, झाक्र्रीको काम गर्दै आएका छन् ।
‘बिहीबार ६ बजेतिर रतुवामाइको लरीकट्टा भन्ने ठाउँमा काम परेको छ । त्यहाँ जान्छु भनेर घरबाट जानुभएको रहेछ,’ सुनवर्षी नगरपालिका ४ का वडाअध्यक्ष छेदिया यादवले भने, ‘ ‘अहिले शव भेटिएको छ ।’ प्रहरी प्रशासनले घटनाको सुष्म रूपमा अनुसन्धान गरी दोषीलाई कडा कारवाही हुनुपर्ने उनले बताए ।

यादव असोज १४ गते घरबाट काम गर्ने भनेर प्र. न. १०२०४४ प. ३२६१ नम्बरको मोटरसाइकल लिएर हिँडेका थिए । घरबाट हिँडेको भोलिपल्ट शुक्रवार बिहान रङेली बटरवारी जाने भित्री सड्क खण्डको बाटोमा पार्किङ गरी राखी मोटरसाइकल राखेको स्थान बाट अन्दाजी १०÷ १२ मिटर दक्षिण बाटोमा कोल्टे परी मृत अवस्थामा शव फेला परेको मोरङ प्रहरीका प्रवक्ता डिएसपी दीपक श्रेष्ठले जानकारी दिए । यादवको पेटमा छुरी प्रहार गरी हत्या गरेको हुनसक्ने प्रहरीले आशंका गरेको छ । पेट र शरीर भरी छुरा प्रहार गरेको चोटपटक लागकेो छ ।
घटनास्थलमा मोरङ प्रहरी र इलका प्रहरी कार्यालय रंगेलीले संयुक्त रुपमा अनुसन्धान सुरू गरेको छ । घटनास्थलमा तालिम प्राप्त कुकुर सहितको टोली खटी अनुसन्धान पनि गरेको थियो ।