विराटनगर, ६ भदौ । भाषा, संस्कृती र कला मुलुकको गहना भएकोले यसको संरक्षण र जर्गेना गर्नु हामी सबैको कर्तव्य भएको सुझाव एक कार्यक्रमका सहभागिहरुले दिएका छन् ।

हिपमत मिडिया हाउस प्रालि विराटनगरद्वारा आज विराटनगरमा आयोजित नेपाली देशभक्ति म्युजिक भिडियो ‘ म परदेशी बन्दिन’ को विमोचनका अवसरमा सहभागीहरुले कला, संस्कृतीको कुनै सीमा हुने हुनाले यसको संरक्षणले मुलकको मौलिकता झल्कने बताएका हुन् ।
विराटनगर महानगरपालिकाका मेयर नागेश कोइरालाले म्युजिक भिडियोको विमोचन गर्दै मुलुकको चिनारी झल्काउन विकास निर्माणसँगै कला, संस्कृति र भाषाको संरक्षण गर्नुपर्नेमा जोड दिए ।

उनले महानगरपालिका यस क्षेत्रका साहित्यकार, कलाकारहरुको पहिचान स्थापित गर्न सक्दो सहयोग गर्ने प्रतिवद्धता व्यक्त्त गरे । कार्यक्रममा राष्ट्रिय सभाका पूर्व सांसद एवम् प्राज्ञ खेम नेपालीले कला संस्कतीको जगेर्ना गर्नुपर्ने बताए ।

हिपमत मिडियाका अध्यक्ष वीरेन्द्रकमार साह, सदानन्दन मण्डल, प्रेमकुमार यादव, बसुन्धरा झा लगायतले कला, संस्कृतिको संरक्षणबाट पर्यटन व्यवसाय फस्टाउनका साथै मुलुकको विकास झल्कने विचार राखे ।

सोही अवसरमा भाषा, कला , संस्कृति क्षेत्रमा कार्य गर्ने विभिन्न एक दर्जन कलाकारहरुलाई सम्मान गरिएको थियो । विमोचन गरिएको गीतका गायक वीरेन्द्रकुमार झा हुन् ।