शालिग्राम–मञ्जु दाहाल शिक्षा पत्रकारिता पुरस्कार शर्मा र भट्टराईलाई - News Birat

शालिग्राम–मञ्जु दाहाल शिक्षा पत्रकारिता पुरस्कार शर्मा र भट्टराईलाई

न्यूज विराट

विराटनगर । शालिग्राम–मञ्जु दाहाल शिक्षा पत्रकारिता पुरस्कारबाट दुई जना पत्रकार पुरस्कृत हुनुभएको छ । आज विराटनगरमा प्रेस चौतारी नेपाल मोरङ जिल्ला कमिटीले एक कार्यक्रमको आयोजना गरि वरिष्ठ पत्रकार यज्ञ शर्मा र लिलाराज भट्टराईलाई पुरस्कृत गरेको हो । उहाँहरुलाई नगद २१ हजार सहित दोसल्ला र सम्मानपत्रले सम्मान गरिएको छ ।

नेकपा एमालेका बरिष्ठ उपाध्यक्ष तथा पूर्व उपप्रधानमन्त्री ईश्वर पोखरेलले उहाँहरुलाई पुरस्कार प्रदान गर्नुभएको छ । विस २०७६ मा स्थापना भएको उक्त्त पुरस्कार कोरोना महामारीका वितरण हुन नसकेकोमा वि.सं. २०७७ को शर्मा र २०७८ को भट्टराईलाई प्रदान गरिएको हो ।

बरिष्ठ उपाध्यक्ष पोखरेलले सञ्चारकर्मीहरुले समाजमा रहेको विकृति एवं विसङ्गति अन्त्यका लागि सत्य तथ्यका आधारमा आम नागरिकमा सूचना पस्कनुपर्ने जोड दिनुभयो ।

उहाँले चौतारी आवद्ध पत्रकारहरुले व्यवसायिक पेशागत क्षमताका आधारमा आफ्नो दक्षता प्रदर्शन गर्नुका साथै पार्टीको नीति तथा कार्यक्रमका सम्वन्धमा नागरिकहरुलाई जानकारी दिने भूमिका निर्वाह गर्नुपर्ने बताउनुभयो ।

उहाँले भन्नुभयो,‘प्रेस चौतारीका साथीहरुले ‘टु इन वन’ को भूमिका निर्वाह गर्नुपर्छ, एकातिर सत्य र तथ्यमा आधारित भएर व्यवसायीक पत्रकारिताको माध्यमबाट सुसुचित गर्ने, अर्कोतर्फ पार्टीका बिचार र सिद्धान्तलाई पनि अवलम्बन गर्नुपर्ने ।’

पोखरेलले राष्ट्रिय राजनीतिमा रहेको विकृति अन्त्यका लागि तथ्यमा आधारित सही समाचार सम्पेषण गर्नुपर्ने आवश्यकता रहेको बताउनुभयो ।

कार्यक्रममा प्रेस चौतारीका केन्द्रीय सचिव विक्रम लुईटेल, चौतारी प्रदेश १ का अध्यक्ष अविजाल विष्ट, पुरस्कार छनौट समितिका सदस्य रामचन्द्र अधिकारी र प्रेस चौतारी मोरङका अध्यक्ष सुदिप कोइरालालगायतले  पुरस्कृत हुनेहरुलाई बधाई दिँदै सञ्चार माध्यमलाई प्रवर्धन गर्न र स्वतन्त्र अभिव्यक्तिमा पार्टीको ठूलो योगदान रहने बताउनुभयो ।

मा प्रकाशित

यसमा तपाईको मत:

© Copyright 2017 - 2022 Newsbirat pvt ltd. All Rights Reserved.

Design / Developed by codebundles