विराटनगर, २० असार । प्रदेश नं १ का मुख्यमन्त्री राजेन्द्रकुमार राईले खेलाडी राष्ट्रको गहना रहेको बताउनु भएको छ। प्रदेश नं १ खेलकुद विकास बोर्डद्वारा आज यहाँ आयोजित प्रदेशबाट साफ, एशियन तथा ओलम्पिक खेलकुदमा सहभागी खेलाडीलाई सम्मान गर्दै उहाँले सो विचार व्यक्त्त गर्नु भएको हो ।

मुख्यमन्त्री राईले सरकारले खेलाडीहरुलाई उच्च प्राथमिकता एवं सम्मान दिएको छ भन्दै खेलकुदको माध्यमबाट विश्वमा नेपाललाई चिनाउने कार्यमा खेलाडी सफल भएकोमा खुशी प्रकट गर्नुभयो ।

उहाँले प्रदेश सरकारले हालै सार्वजनिक गरेको नीति तथा कार्यक्रममा खेलकदको विकासका लागि आवश्यक पूर्वाधार निर्माणका लागि बजेट विनियोजन गरेको जानकारी दिनुभयो ।

सामाजिक विकास मन्त्री राजन राईले प्रदेशमा दक्ष खेलाडी उत्पादनका लागि प्रशिक्षकहरुलाई विशेष तालीम लगायत खेलकुदका विभिन्न कार्यक्रम आयोजना गरेको विचार राख्नु भयो ।

विराटनगर महानगरपालिकाका प्रमुख नागेश कोइरालाले खेललाई व्यवसायिक रुपमा अगाडि वढाउनु पर्नेमा जोड दिनु भयो । सो अवसरमा प्रदेशबाट विभिन्न समयमा ओलम्पिक खेलमा सहभागी नौ, एशियन खेलमा ३६ र साफमा सहभागी १५० खेलाडीहरुलाई सम्मान गरिएको थियो ।

नोबेल मेडिकल कलेज विराटनगर र काठमाण्डौं मेडिकल कलेजले सम्मानित खेलाडीहरुलाइ आगामी पाँच बर्षसम्म निःशुल्क केविन सहित स्वास्थ्य उपचार सेवा उपलव्ध गराउनुका परिवारका सदस्यहरुलाई ५० प्रतिशत छुटमा सेवा दिने सम्झौता भएको जानकारी वोर्डका सदस्य सचिव हंशराज वाग्लेले बताउनु भयो ।

यस अघि मुख्यमन्त्री राई खेलाडीको सम्मानमा कार्यक्रमस्थलसम्म प्रहरी व्याण्ड र खेलाडीहरुका साथमा पैदलयात्रा गर्नु भएको थियो ।