विराटनगर, ३० जेठ । विराटनगर महानगर पालिकाका प्रमुख नागेश कोइरालाले यस नगरलाई मुलुकको दोश्रो ठूलो शहरको रुपमा विकासित गर्ने लक्ष्यका साथ काम गर्ने बताउनु भएको छ।

एकता समाज विराटनगरद्वारा आज यहाँ आयोजित महानगरप्रमुख, उपप्रमुख एवं जनप्रतिनिधिहरुसँग विकास , शिक्षा र सरसफाई तथा सम्मान कार्यक्रममा बोल्दै उहाँले महानगरको गुमेको शाख पुनः स्थापित गर्नका साथै सफा, सुन्दर र हराभरा, सन्दर एवं शिक्षित शहर बनाउने उद्देश्यले सबैको सहयोगका साथ काम गर्ने प्रतिवद्धता व्यक्त गर्नु भयो ।

प्रमुख कोइरालाले जनप्रतिहरुले पार्टी भन्दा माथि उठेर नागरिकको सेवा सुविधा सहजरुपमा उपलव्ध गराउनतर्फ ध्यान केन्द्रीत गर्नुपर्नेमा जोड दिनु भयो ।उपप्रमुख शिल्पा निराला कार्कीले महिला सशक्तीकरण,महिला स्वरोजगार र सुरक्षित सहर निर्माण गर्नेतर्फ ध्यान केन्द्रीत रहेको धारणा राख्नु भयो ।

एकता समाजका अध्यक्ष सञ्जय नेपाल, वडा नं ११ का अध्यक्ष तीर्थेन्द्र न्यौपाने र इन्द्र खतिवडाले वडाको भित्र रहेको नहरलाई पर्यटकीय स्थलको रुपमा शौन्दर्यकरण गर्न निजी क्षेत्रको सहयोगमा कार्य गर्ने जानकारी दिनु भयो ।