बम तथा विस्फोटक पदार्थ प्रयोग गरेर मानिस मारेको आरोप लागेर पुर्पक्षका लागि थुनामा रहेका नेपाली कांग्रेसका नेता एवं पूर्व मन्त्री मोहम्मद अफताव आलमलाई थुनामुक्त गराउन सर्वोच्च अदालतले अस्वीकार गरेको छ । सुष्मालता माथेमा र नहकुल सुवेदीको इजलासले आलमलाई बाहिरै बसेर मुद्दा लड्ने सुविधा दिन नमान्ने आदेश दिएको हो ।

रौटहटको राजपुरमा बम विष्फोटमा घाइतेलाई जिउँदै इँटाभट्टामा हालेर मारेको आरोपमा आलम २६ असोज ०७६ मा पक्राउ परेका थिए । जिल्ला अदालत रौतहटले आलमलाई पुर्पक्षका लागि थुनामा पठाएर मुद्दा सुनुवाइ गर्ने आदेश दिएको थियो ।

उक्त आदेशविरुद्ध आलम उच्च अदालत गएका थिए । उच्चले जिल्लाकै आदेश सदर गरेपछि आलम असोज २०७७ मा थुनाबाहिर बसेर मुद्दा लड्न पाउँ भन्दै निवेदन लिएर सर्वोच्च पुगेका थिए । तर, सर्वोच्चले समेत उनको माग अस्वीकार गरेको छ । पहिलो संविधानसभा निर्वाचनको अघिल्लो रात २७ चैत ०६४ मा बम बनाइरहेको ठाउँमा विस्फोट हुँदा घाइते २२ जनालाई इँटाभट्टामा जलाएर मारेको अभियोगमा उनलाई प्रहरीले पक्राउ गरेको थियो । तर, जाहेरी भने दुई जनाको मात्र परेको थियो । बम बनाउने क्रममा विस्फोट हुँदा त्रिलोकप्रताप सिंह ‘पिन्टु’ र मोहम्द ओसी अख्तरको मृत्यु भएको थियो ।

चुनावमा बुथ क्याप्चर गर्ने उद्देश्यसहित आलमले बम बनाउन लगाएको प्रहरी अनुसन्धानबाट खुलेको थियो । प्रहरीले पक्राउ गर्दा आलमले ‘तह’ लगाइदिने भन्दै धम्की दिएका दिए । पक्राउपछि आलम समर्थकले रौतहट सदरमुकाम गौरमा दिनहुँ विरोध प्रदर्शन गरेका थिए भने जिल्ला अदालतका न्यायाधीशहरू पुर्पक्षका लागि थुनामा पठाउने आदेश दिएर काठमाडौं आएका थिए ।