विराटनगर, १० वैशाख । जनता समाजवादी पार्टी नेपालका संघीय परिषद् सदस्य उमेश यादवले पार्टी परित्याग गरेको घोषणा गर्नु भएको छ ।
उहाँले शनिबार पत्रकार सम्मेलनमा पार्टीको साधारण सदस्य पदमा नरहने गरी पार्टी छाडेको जानकारी दिनुभयो । यादवले अन्य कुनै पार्टीमा प्रवेश नगर्ने समेत जनाउनु भयो ।
मोरङका प्रभावशाली नेता रहनु भएका यादवले विराटनगरमा पार्टी बलियोे अवस्थामा हुँदा समेत गठबन्धन गरी महानगरपालिकाको प्रमुख पदमा छोडेकोमा विरोध गर्नुभयो । उहाँले पार्टीले महानगर प्रमुखमा जित्ने अवस्थामा रहँदा रहँदै प्रमुख पद छाडेको विरोधस्वरुप पार्टी त्याग गरेको जानकारी दिनुभयो ।
नेता यादवले गठवन्धनबाट कार्यकर्तालाई ठूलो धोका भएको चर्चा गर्दै भोलि महानगर प्रमुखको पदमा स्वतन्त्रको रुपमा उम्मेदवारी दिने घोषणासमेत गर्नुभयो । यादवले वि.सं. २०७४ महानगरको निर्वाचनमा जसपाबाट महानगर प्रमुख पदमा उम्मेदवारी दिइ तेश्रो स्थान ल्याउनु भएको थियो ।