काठमाडौं, २४ माघ । गृह मन्त्रालयले सशस्त्र प्रहरी बल र नेपाल प्रहरीको एकीकृत अनुगमन तथा मूल्यांकन कार्यढाँचा बनाउने तयारी गरेको छ ।

मातहतका दुवै सुरक्षा निकायको एकीकृत अनुगमनले सुरक्षा निकायहरूको कार्यसम्पादनमा प्रभावकारिता वृद्धि हुने भन्दै एकीकृत अनुगमन तथा मूल्यांकन कार्य ढाँचा अगाडी बढाउने तयारी गृह मन्त्रालयले गरेको हो ।

सो ढाँचा ६ महिनाभित्र बनाइसक्ने लक्ष्य गृह मन्त्रालयको छ । सोमबार गृह मन्त्रालयले गृह प्रशासन सुधार योजना-२०७८ सार्वजनिक गर्दै प्रहरी र सशस्त्र प्रहरी बलको पुनः सङ्गठन तथा व्यवस्थापन सर्वेक्षण गर्ने समेत उल्लेख गरेको छ ।

त्यस्तै प्रहरी कल्याण कोषबाट प्रहरी कर्मचारीहरूलाई प्रदान गरिने सेवा सुविधाको पारदर्शिता एवं प्रभावकारिताका लागि विश्वसनीय लेखा परीक्षण प्रणालीसहितको मापदण्ड/निर्देशिका जारी गर्ने लक्ष्य गृह मन्त्रालयको छ ।

योबाहेक मातहतका निकायको सुधारका लागि गृह मन्त्रालयले २०६ बुँदा सार्वजनिक गरेको छ ।