विराटनगर, २३ माघ । प्रदेश १ का मुख्यमन्त्री राजेन्द्र राईले मन्त्रिपरिषद् विस्तार गरेका छन् । सत्ता गठबन्धनमा रहेका दलहरूबीच भागबण्डामा सहमति जुटेसँगै आइतबार मुख्यमन्त्री राईले कांग्रेस र एकीकृत समाजवादीका तीन–तीन र माओवादी केन्द्रका दुई जनालाई समेटेर मन्त्रिपरिषद् विस्तार गरेका हुन् ।

प्रदेश १ मा कांग्रेसबाट शेखरचन्द्र थावालाई वन, वातावरण तथा भूसंरक्षणमन्त्री, ओमप्रकाश सरावगीलाई उद्योग, श्रम तथा रोजगारमन्त्री र प्रकाशप्रताप हाङ्गाम भूमि व्यवस्था, सहकारी तथा गरिबी निवारणमन्त्रीमा नियुक्त भएका छन् ।

यस्तै माओवादी केन्द्रका संसदीय दलका उपनेता रामकुमार राई सिँचाइ तथा उर्जामन्त्री र प्रमुख सचेतक झलकबहादुर मगरलाई कृषिमन्त्रीमा नियुक्त भएका छन् ।

मुख्यमन्त्री राईले एकीकृत समाजवादीका सांसद राजन राईलाई सामाजिक विकासमन्त्री, खिनु लङ्वा लिम्बुलाई पर्यटन तथा संस्कृतिमन्त्री र उपेन्द्र घिमिरेलाई सूचना, यातायात व्यवस्था तथा सञ्चारमन्त्रीमा नियुक्त गरेका छन् । नवनियुक्त मन्त्रीलाई आजै प्रदेश प्रमुख पर्शुराम खापुङले शपथ ग्रहण गराउने छन् ।

यसअघि १६ माघमा बसेको मन्त्रिपरिषद् बैठकले मन्त्रालय फुटाएर मन्त्रिपरिषद्को आकार बढाउने निर्णय गरेको थियो । प्रदेश १ को सत्ता गठबन्धनमा नेपाली कांग्रेस, मओवादी केन्द्र, नेकपा (एस), जनता समाजवादी र संयुक्त लोकतान्त्रिक राष्ट्रिय मञ्च छन् । १५ कात्तिकमा एमालेका मुख्यमन्त्री भीम आचार्यले राजीनामा दिएपछि १६ कात्तिकमा राई मुख्यमन्त्रीमा नियुक्त भएका थिए ।

मुख्यमन्त्रीमा नियुक्त भएलगत्तै राईले आर्थिक मामिला तथा योजना मन्त्रीमा नेकपा माओवादी केन्द्र संसदीय दलका नेता इन्द्रबहादुर आङ्बोलाई नियुक्त गरेका थिए । मुख्यमन्त्री राईले उनको जिम्मेवारी यथावत राखेका छन् ।

त्यस्तै नेपाली कांग्रसका हिमाल कार्कीलाई भौतिक पूर्वाधार विकासमन्त्रीको जिम्मेवारी हेरफेर गर्दै सडक पूर्वाधार तथा शहरी विकास मन्त्रीको जिम्मेवारी दिएका छन् । आन्तरिक मामिला तथा कानुनमन्त्रीमा केदार कार्कीको जिम्मेवारी यथावत राखिएको छ ।

सामाजिक विकास मन्त्री रहेका जनता समाजवादी पार्टीका नेता जयराम यादवको जिम्मेवारी फेरीएको छ । उनलाई मुख्यमन्त्री राईले स्वास्थ्यमन्त्रीको जिम्मेवारी दिएका छन् ।

सामाजिक विकास राज्यमन्त्री रहेकी संघीय लोकतान्त्रिक राष्ट्रिय मञ्चकी विष्णु तुम्बाहाम्फेको जिम्मेवारी पनि यथावत राखिएको छ । नवनियुक्त मन्त्रीहरुले आइतबार पद तथा गोपनियताको सपथ लिइसकेका छन् ।