नोबेल मेडिकल कलेजको आन्दोलन स्थगित गर्न प्रशासनको आग्रह, विद्यार्थी संगठनहरुको अडान कायमै - News Birat

नोबेल मेडिकल कलेजको आन्दोलन स्थगित गर्न प्रशासनको आग्रह, विद्यार्थी संगठनहरुको अडान कायमै

न्यूज विराट

विराटनगर, १० माघ । विराटनगरस्थित नोबेल मेडिकल कलेजविरुद्धको आन्दोलन स्थगित गर्न जिल्ला प्रशासन कार्यालय मोरङले आग्रह गरेको छ । आन्दोलनका कारण कोरोना संक्रमणको जोखिम बढ्ने भएकाले सम्पूर्ण आन्दोलनका कार्यक्रम स्थगित गरिदिन प्रशासनले आग्रह गरेको हो ।

आइतबार मोरङका प्रमुख जिल्ला अधिकारी काशीराज दाहालले पत्राचार गर्दै आन्दोलनका कार्यक्रम स्थगित गर्न आग्रह गरेका हुन् । एमबिबिएसमा भर्ना हुने विद्यार्थीहरुसँग नोबेल मेडिकल कलेजले चिकित्सा शिक्षा आयोगबाट निर्धारण भएको भन्दा बढी लिएको विषयमा अनुसन्धान गरि कानुन बमोजिम कारबाही प्रकृया समेत अघि बढीसकेकाले आन्दोलनका कार्यक्रम स्थगित गर्न प्रजिअ दाहालले आग्रह गरेका हुन् ।

‘कलेजको विषयमा जिल्ला प्रहरी कार्यालयलाई छानविन गरि कारवाही गर्नु भनेर पठाइसकेका छौँ । प्रहरीले कारवाही प्रकृया सुरु गरिसकेको छ ।’ प्रजिअ दाहालले भने,‘कोभिडको महामारी फैलिइरहेको छ । यो बेलामा आन्दोलन स्थगित गर्नुस भनेर आग्रह गरेका छौँ । उहाँहरुले यस्तो बेलामा स्थगित गर्नुपर्ने हो ।’

यता विद्यार्थी संगठनहरुले भने नोबेल मेडिकल कलेज र राज्यलाईनै चुनौती दिने कलेज सञ्चालक सुनिल शर्मालाई कारबाही नभएसम्म आन्दोलन जारी राख्ने बताएका छन् । नेकपा (एस) निकट अनेरास्ववियूका सहअध्यक्ष वसिम आलमले कलेज र सञ्चालक शर्मालाई कारबाही नभएसम्म आन्दोलन जारी रहने बताए । ‘सिडियोले आन्दोलन स्थगित गर्न विद्यार्थी संगठनहरुलाई आग्रह गर्नुभएको पत्र प्राप्त भएको छ, आग्रह गर्न त पाइयो ।’ उनले भने,‘तर, जबसम्म दोषिलाई कारबाही हुँदैन तबसम्म हाम्रो आन्दालन जारी रहन्छ । मुद्धा दर्ता भएर कारबाही अगाडी बढेपछि मात्र आन्दोलन रोकिन्छ ।’

आलमले कलेजले विद्यार्थीको आन्दोलन तुहाउन केही विकाउ अभिभावकसँग सहमतिको नाटक गरेपनि त्यसलाई सवै विद्यार्थी र अभिभावकले नमानेको बताए । उनले विद्यार्थीको आन्दोन जारी रहेको बताउँदै आजपनि सिठी जुलुस निकालिने बताए ।

लामो समयदेखि अतिरिक्त शुल्क फिर्ता लिन माग गर्दै नोबेल मेडिकल कलेजमा अध्ययनरत विद्यार्थी, अभिभावक र विद्यार्थी संगठनहरु आन्दोलित छन् । उनीहरुले अतिरिक्त शुल्क लिने नोबेल मेडिकल कलेज र त्यसका सञ्चालन सुनिल शर्मालाई कारबाहीको माग गर्दै आन्दोलन जारी राखेका हुन् ।

मा प्रकाशित

यसमा तपाईको मत:

© Copyright 2017 - 2022 Newsbirat pvt ltd. All Rights Reserved.

Design / Developed by codebundles