विराटनगर, ६ माघ । प्रदेश १ को सामाजिक विकास मन्त्रालयले जिल्ला अस्पतालहरूलाई कोरोना संक्रमितको उपचारका लागि तयारी अवस्थामा रहन निर्देशन दिएको छ । बिहीबार सामाजिक विकासमन्त्री जयराम यादवको अध्यक्षमा बसेको बैठकले कोरोना संक्रमितहरू बढ्दो क्रममा रहेकाले जिल्ला अस्पतालहरूलाई उपचारका लागि तयारी अवस्थामा रहन निर्देशन दिएको हो ।

मन्त्रिस्तरीय बैठकले बिहीबार १४ वटै जिल्ला अस्पतालहरूलाई तयारी अवस्थामा रहनका लागि निर्देशन जारी गर्ने निर्णय गरेको छ ।

संक्रमितको उपचारका लागि उपकरण तथा स्वास्थ्य सामाग्रीहरू अस्पतालले प्रवन्ध गर्ने र आवश्यक सामग्री मन्त्रालयले सहजीकरण गर्ने निर्णय भएको जनाइएको छ । बैठकले सामुदायिक तथा निजी अस्पतालहरूलाई पनि कोरोना संक्रमितको उपचारका लागि आग्रह गर्नेसमेत निर्णय गरेको छ ।