विराटनगर, २० मंसिर । नेपाली कांग्रेस प्रदेश १ को सभापतिमा उद्धव थापा निर्वाचित भएका छन् । उनलाई सभापति शेरबहादुर देउवा र नेता कृष्णप्रसाद सिटौलाको समर्थन थियो ।

पौडेल समूहबाट उम्मेदवार बनेका गुरुराज घिमिरे २ मतले पराजित भए । सुरुवातदेखि नै झिनो मतको अग्रता लिएका घिमिरे अन्तिम परिणाम आउँदासम्म २ मतले निराश भएका हुन् ।

थापा ८ सय ४४ मतका साथ विजयी हुँदा घिमिरेले ८ सय ४२ मत पाए । १ हजार ७ सय ५२ मत खसेको थियो । प्रदेश उपसभापति पदमा पनि संस्थापन पक्षका रमेशजंग रायमाझी ८ सय ९१ र टंकप्रसाद राईले ८ सय ४७ मत प्राप्त गरी विजयी भएका छन् ।

महामन्त्रीमा संस्थापन समूहका भुपेन्द्र राई ८ सय २४ र संस्थापनइतरका उमेश थापाले ८ सय २३ मत ल्याएर विजयी भए । सहमहामन्त्रीमा खड्ग फागो, विनोद बस्नेत र प्रमिला गच्छदार निर्वाचित भएका छन् ।