विराटनगर, २४ कात्तिक । विराटनगर हरिहर चोकमा बुधबार विहान एक जनामाथि खुकुरी प्रहार भएको छ । विराटनगर–८ अशोक चोकका अफाक आलममाथि खुकुरी प्रहार भएको हो ।

आज विहान साढे ८ बजेतिर काममा जाँदै गर्दा ८ जनाको समूहले खुकुरी प्रहार गरि घाइते बनाएको आलमकी पत्नी हसिदा खातुनले बताइन् ।

स्कुटीमा काममा जाँदै गर्दा बाटो छेकेर विराटनगर–८ का ३० वर्षीय मो. कादिर, अन्सारी, २० वर्षीय मो. साराजुन, २० वर्षिय मो. अन्सारुल, ४५ वर्षीय मो. बाजील, २२ वर्षीय मो. सोनु र नाम नखुलेका अन्य दुई जना व्यक्तिले आक्रमण गरेको आलमकी पत्नी खातुनले आरोप लगाइन् ।

खुकुरी प्रहारबाट आलम घाइते भएका छन् । उनको खुट्टा, हात र शरिरको विभिन्न भागमा चोट लागेपनि अवस्था सामान्य रहेको जिल्ला प्रहरी कार्यालय मोरङले जनाएको छ । घाइते आलम विराटनगरस्थित कोसी अस्पतालमा उपचारपछि घर फर्किएको मोरङ प्रहरीका प्रवक्ता प्रहरी नायव उपरिक्षक दिपक श्रेष्ठले जानकारी दिए ।

उनका अनुसार पारिवारिक विवादका कारण झगडा हुँदा आलममाथि आक्रमण भएको हो । आक्रमणमा संलग्न व्यक्तिहरुको खोजि कार्य जारी रहेको प्रवक्त श्रेष्ठले जानकारी दिए ।