विराटनगर, ९ भदौ । प्रदेश १ की सामाजिक विकास मन्त्री उषाकला राईले दलित समुदायको सवालमा प्रदेश सरकार संवेदनशिल बनेको बताएकी छिन् ।

बुधबार राष्ट्रिय दलित पत्रकार संघ प्रदेश नं. १ को टोलीसँगको अन्तरक्रिया कार्यक्रममा मन्त्री राईले दलित समुदायका समस्या समाधानका लागि प्रदेश सरकार सजग र संवेदनशिल रहेको बताएकी हुन् ।

उनले प्रदेश नं. १ लाई छुवाछुतमुक्त बनाउन र सबै जातजातीबीचको सम्बन्ध सुमधुर बनाउन प्रदेश सरकार सदैव क्रियाशिल रहने बताइन् । मन्त्री राईले सरकारले दलितका समुदायको हक अधिकारका लागि छुट्टै ऐन बनाउने र त्यसका लागि नीति तथा कार्यक्रममा समेत समावेश गरेको जानकारी दिइन् ।

मन्त्री राईले उत्पीडनमा पारिएका समुदायलाई अधिकार र न्याय चाहिएकाले सबैले साथ दिनुपर्नेमा समेत जोड दिइन् ।

संघले हालै सर्वाेच्च अदालतले आरक्षणलाई जातको आधारमा नदिनेगरी फैसला गरेपछि सो आदेशविरुद्ध अभियान सञ्चालन गर्दै आएको छ । सोही क्रममा संघले सामाजिक विकासमन्त्री राईसँग अन्तरक्रिया गरेको थियो ।

सो अन्तरक्रियामा संघका बरिष्ठ उपाध्यक्ष गोपाल बराइली, प्रदेश अध्यक्ष नैन विश्वकर्मा, कोषाध्यक्ष पदम सरदार, संघका मोरङ अध्यक्ष किशोर विश्वकर्मा लगायतको सहभागीता रहेको थियो ।