आइतबार थप १ हजार ९ सय २० जनामा कोरोना भाइरस संक्रमण पुष्टि भएको छ।  पछिल्लो २४ घण्टामा कुल १२ हजार ५ सय १६ नमूना परीक्षण भएकोमा सो संख्यामा संक्रमण पुष्टि भएको हो ।

सो मध्ये ९ हजार ४ सय ४३ पीसीआर र ३ हजार ७३ नमूनाको एन्टिजेन विधिबाट परीक्षण भएको स्वास्थ्य तथा जनसंख्या मन्त्रालयले जनाएको छ ।

आइतबार कोरोना मुक्त हुनेको संख्या समेत बढी देखिएको छ । कुल २ हजार २ सय ४८ जना कोरोनामुक्त भएसँगै हालसम्म ६ लाख ९८ हजार १ सय ७३ जना संक्रमण मुक्त भएका हुन् । यस्तै पछिल्लो २४ घण्टामा थप २४ जनाको मृत्यु भएको र यो सहित कोरोनाबाट मृत्यु हुनेको संख्या १० हजार ५ सय ९ पुगेको छ।

हालसम्म कोरोनाका सक्रिय संक्रमितको संख्या ३८ हजार ७ सय ५१ रहेको छ ।