विराटनगर, २१ साउन । संघीय सरकारले भूमि सम्बन्धी समस्या समाधान आयोग खारेज गरेको भन्दै प्रदेश १ को प्रदेशसभामा सत्तारुढ नेकपा एमालेका सांसदले आक्रोश पोखेका छन् ।

बिहीबारको प्रदेशसभा बैठकमा एमालेका सांसद तुलसीप्रसाद न्यौपानेले भूमि सम्बन्धी समस्या समाधान आयोग खारेज गरेकोमा आक्रोश व्यक्त गरेका हुन् । परमादेशबाट बनेको कम्फटेबल सरकारले भूमि सम्बन्धी समास्या समाधान आयोग खारेज गरेर सुकुमबासी भूमिहिन अव्यवस्थित बसोबासी २० औं लाख गरिबको पेटमा लात बजारेको उनको आरोप छ ।

ओली सरकारले गरेका निर्णय र कामहरू उल्ट्याउँदै जाने हो भने देश अँध्यारो सुरूङ्मा जाने उनले दाबी गरे । अघिल्लो सरकारले गरेका निर्णयहरू उल्ट्याउँदै जाने भए धराहरा पनि भत्काउने ? रानी पोखरी भत्काउने ? सगरमाथाको उचाई घटाउने हो ? भन्दै उनले प्रदेश सभामा आक्रोश पोखे ।

‘यसअघिका सबै काम खारेज गर्दै जाने हो भने अरुण तेस्रो बन्द गर्नुपर्यो, उत्तरका नाकाहरु बन्द गरेर नेपाललाई कहिल्यै निस्किन नसक्ने गरी नाकाबन्दीको कालो युगमा धकेल्नु पर्यो त्यो सम्भव छ ?’ उनले भने ।