प्रतिबन्धित क्याफिनयुक्त शक्तिवर्द्धक पेय पदार्थ रेडबुल बिक्री वितरण गर्ने चार जनालाई प्रहरीले पक्राउ गरेको छ । पक्राउ पर्नेमा काठमाडौं बबरमहलका ४४ वर्षीय रवीन श्रेष्ठ, बाँके कोहलपुर घर भई हाल गंगबु बस्ने ३६ वर्षीय राजु पौडेल, ओखलढुंगा घर भई हाल रातोपुल बस्ने धनबहादुर श्रेष्ठ र सर्लाही घर भई हाल काठमाडौं गोठाटारका वीरेन्द्र चौधरी रहेको प्रहरीले जनाएको छ ।

रवीन श्रेष्ठ न्युरोडस्थित प्रविण स्टोरका सञ्चालक हुन् भने धनबहादुर कपनस्थित शक्ति स्टोर सञ्चालक । चौधरी र पौडेल भने रेडबुल ओसारपोसर गर्ने काममा संलग्न थिए ।

उनीहरूलाई उपत्यका अपराध अनुसन्धान नियन्त्रण कार्यालयको टोलीले मंगलबार पक्राउ गरेको हो । श्रेष्ठद्वयको स्टोरबाट समान ५९-५९ कार्टुन रेडबुल बरामद भएको उपत्यका अपराध अनुसन्धान नियन्त्रण कार्यालयका प्रमुख एसएसपी चन्द्रकुवेर खापुङले जानकारी दिए ।

त्यस्तै चौधरीले चलाउँदै आएको बा २१ च १२५ नम्बरको पिकअप भ्यानबाट ८४ कार्टुन र पौडेलका साथबाट ३६ गरी कुल दुई सय दुई कार्टुन रेडबुल बरामद गरेको छ । सरकारले २ असार २०७६ मै क्याफिनयुक्त शक्तिवर्द्धक पेय पदार्थ नेपालमा बिक्री वितरणमा रोक लगाएको थियो । तर, उनीहरूले भारतीय सीमानाका हुँदै भन्सार छलेर ल्याएको खुलेको एसएसपी खापुङले बताए ।  उनीहरूमाथि प्रहरीले कालोबजारी अन्तर्गतको कसूरमा मुद्दा चलाउने जनाएको छ ।