देउवालाई विश्वासको मत दिएको भन्दै युवा संघले जलायो माधव नेपालको पुतला - News Birat

देउवालाई विश्वासको मत दिएको भन्दै युवा संघले जलायो माधव नेपालको पुतला

न्यूज विराट

नेकपा एमालेका वरिष्ठ नेता तथा पूर्वप्रधानमन्त्री माधवकुमार नेपालको पुतला दहन गरिएको छ ।

सोमबार बालकुमारीमा राष्ट्रिय युवा संघ नेपालले पार्टीको निर्देशन विपरीत प्रधानमन्त्री शेरबहादुर देउवालाई विश्वासको मत दिएको भन्दै नेता नेपालको पुतला दहन गरेको हो ।

प्रदर्शनमा युवा संघका स्थायी समिति सदस्य महेश चौलागाईंले नेता नेपाल पार्टीमा कलंकको टीका भएको बताए । उनले देउवालाई विश्वासको मत दिने नेपालसहित २२ सांसदको निर्वाचन क्षेत्रमा पनि पुतला दहन गरिएको बताए ।

‘हामीले माधव नेपालको घरअघिबाट उहाँलाई चेतावनी दिएका छौँ, ‘ सदस्य चौलागाईंले भने, ‘गद्दार काम गर्ने भ्रष्ट र विदेशी दलालबाट चल्ने मतियार बोकेका माधव नेपालजस्तालाई तह लगाउन अब युथ फोर्स नेपाल र राष्ट्रिय युवा संघ नेपाल जन्मिसकेको छ ।’

सूर्य चिह्नबाट चुनाव जितेर आफूले रूखमा भोट हाल्नु गद्दारीको पराकाष्टा भएको समेत सदस्य चौलागाईंले बताए ।  आइतबार प्रतिनिधिसभा बैठकमा नेपालसहित एमालेका २२ सांसदले प्रधानमन्त्री देउवालाई विश्वासको मत दिएका थिए ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles