सर्लाही, १२ असार ।सर्लाहीको ईश्वरपुर नगरपालिका वडा नं. ३ का वडाध्यक्ष सूर्यकुमार श्रेष्ठको गए राति हत्या भएको छ ।

प्रहरीका अनुसार वडामा रहेको मुखलाल दास पोखरीको सौन्दर्यकरणको निरीक्षण गर्न गएका वडाध्यक्ष श्रेष्ठको डोजरको बकेटले हानेर हत्या भएको हो ।

पोखरीको निरीक्षण गर्न गएका बेला विवाद भएपछि ५५ वर्षीय श्रेष्ठको हत्या भएको प्रहरीले जनाएको छ । जेसीभीका ठेकेदार प्रेम दाहालसँगै श्रेष्ठ पोखरीको निरीक्षणका लागि त्यहाँ पुगेका थिए ।

खाजा खाने क्रममा जेसीभीका चालक हर्कबहादुर तामाङ र वडाध्यक्षबीच विवाद भएको थियो । त्यसपछि उनीहरू पोखरी विस्तार भइरहेको ठाउँमा पुगेका थिए ।

विवादपछि आक्रोशित बनेका चालकले श्रेष्ठको टाउको र छातीमा जेसीभीको बकेटले हानेर हत्या गरेको नगरपालिकाका मेयर मनोज देबकोटाले बताए । उनका अनुसार हत्या गरेपछि वडाध्यक्षको शव पुरेर चालक भागेका थिए ।

प्रहरीले दाहाल तथा चालक तामाङलाई पक्राउ गरेको छ । श्रेष्ठको शव राति नै निकालेर जिल्ला अस्पताल मलङ्गवा लगिएको छ ।