बजेट यथार्थपरक छ, कार्यान्वयन हुन्छ : मन्त्री आङ्बुहाङ - News Birat

बजेट यथार्थपरक छ, कार्यान्वयन हुन्छ : मन्त्री आङ्बुहाङ

न्यूज विराट

विराटनगर, २ असार । प्रदेश १ का आर्थिक मामिला तथा योजनामन्त्री टंक आङ्बुहाङले आर्थिक वर्ष २०७८/७९ को बजेट यथार्थपरक रहेको दाबी गरेका छन् । आर्थिक मामिला तथा योजना मन्त्रालयमा बुधबार आयोजित सञ्चारकर्मीसँगको भेटमा मन्त्री आङ्बुहाङले बजेटमा पुरानै योजना तथा कार्यक्रम मात्र नभएर प्रतिफल प्राप्त हुने नयाँ कार्यक्रमहरू पनि रहेको बताए ।

अस्पतालको स्तरोन्नति गर्नेजस्ता नयाँ कार्यक्रमसहित आएको बजेट अन्य प्रदेशको भन्दा उत्कृष्ट रहेको मन्त्री आङ्बुहाङले दाबी गरे । प्रदेशको आर्थिक हैसियतअनुसारको आर्थिक रूपान्तरणका लागि बजेट ल्याएको उनको भनाइ थियो ।

बजेटमा आलोचना हुँदै आएको विभिन्न व्यक्तिका नाममा स्थापित प्रतिष्ठानलाई बजेट दिने व्यवस्था राखेको मन्त्री आङ्बुहाङले त्यसको बचाउ गरेका छन् । प्रदेशका नेता तथा सामाजिक व्यक्तित्वको नाममा स्थापित प्रतिष्ठानहरूलाई अनुदानको व्यवस्था गरेर सम्मान प्रकट गरेको उनले बताए ।

निर्वाचनक्षेत्र पूर्वाधार विकास र विशेष कार्यक्रमको कार्यविधि संशोधन गरी कार्यान्वयन गरिने भन्दै उनले निर्वाचनक्षेत्र पूर्वाधार विकास र विशेष कार्यक्रमका लागि एकमुष्ट ७२ करोड बजेट विनियोजन गरेको बताए ।

आर्थिक मामिला तथा योजना मन्त्रालयका सचिव उत्तरकुमार खत्रीले चालु आर्थिक वर्षको २ अर्ब नगद मौज्दात, समानीकरण, सशर्त, समपूरक र विशेष अनुदानको रकम रहेको बताएका छन् ।

१० दिनको पर्यटन काज बिदा निजामति कर्मचारीहरूका लागि मात्रै भएको बताउँदै उनले शिक्षक र प्राध्यापकहरूलाई त्यो सुविधा नभएको बताए । सेवा प्रवाह प्रभावकारी बनाउन कार्यालय आएको प्रत्येक दिन कर्मचारीलाई खाजा खर्चबापत १ सय रुपैयाँ दिने व्यवस्था गरेको मन्त्रालयले जनाएको छ ।

मन्त्री आङ्बुहाङले मंगलबार प्रदेशसभाको बैठकमा आर्थिक वर्ष २०७८/०७९ का लागि ३२ अर्ब ४६ करोड ९२ लाख रुपैयाँको बजेट प्रस्तुत गरेका थिए ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles