मैथिली भाषा संरक्षणका लागि एकजुट हुनुपर्नेमा जोड - News Birat

मैथिली भाषा संरक्षणका लागि एकजुट हुनुपर्नेमा जोड

न्यूज विराट

विराटनगर, ७ चैत । मैथिली भाषा संरक्षणका लागि थप एकजुटता आवश्यक रहेको विराटनगरमा आयोजित एक कार्यक्रमका वक्ताहरुले बताएका छन् । नवगठित मैथिल संचारकर्मी संघका पदाधिकारीलाई बधाई तथा शुभकामना ज्ञापन गर्न नेपाल पत्रकार महासंघ मोरङ शाखामा शनिबार आयोजित कार्यक्रममा बोल्ने वक्ताहरुले यस्तो बताएका हुन् ।

मैथिल ब्राह्मण महासभा युवा कार्यसमिति मोरङले आयोजना गरेको कार्यक्रममा बोल्नुहुँदै मैथिली सेवा समितिका महासचिव तथा आयोजक संस्थाका सल्लाहकार विपुलेन्द्र झाले पछिल्लो समय भाषाभाषीलाई टुक्राउने खेल भइरहेकाले सजग तथा संगठित भएर अघि बढ्नुपर्ने आवश्यकता रहेको बताए ।

सञ्चारकर्मी तथा मैथिली अभियन्ता प्रवीणनारायण चौधरीले सञ्चारकर्ममा जुटेका मैथिली सञ्चारकर्मीहरुले आगामी जनगणना लक्षित कार्यक्रम तथा अभियानहरु चलाउनुपर्ने आवश्यकता रहेको बताए ।

नेपाल प्रेस युनियनका सचिव गोपाल पोखरेलले विविध भाषासंस्कृति र संस्कारहरु राष्ट्रको सम्पत्ति भएको बताउनुहुँदै त्यसको संरक्षण आवश्यक रहेको बताए । उनले सञ्चारकर्ममा जुटेका संचारकर्मीहरुको क्षमता अभिवृद्धि तथा संरक्षण गर्न सरोकारवालाले ध्यान दिनुपर्ने जोड दिए ।

मैथिल संचारकर्मी संघका अध्यक्ष नवीन कर्णले नवगठित संघले संचारकर्मीहरुको क्षमता अभिवृद्धि तथा वृत्ति विकासका निम्ति काम गर्ने प्रतिबद्धता ब्यक्त गरे । आगामी दिनमा संघले भाषा सम्बन्धित विभिन्न अभियानहरु संचालन गर्ने बताउनुहुँदै उहाँले त्यसमा सरोकारवालाको सहभागिता र समर्थन आवश्यक रहेको बताए ।

कार्यक्रमका अन्य सहभागी वक्ताहरुले मैथिली भाषाको आफ्नै लिपी, व्याकरण, साहित्य र इतिहाससमेत रहेकाले यो भाषा हरेक हिसाबले समृद्ध रहेको बताएका थिए । यद्यपि पछिल्लो समय भाषाभाषीमा फुट ल्याउने तथा कमजोर बनाउने प्रयास भइरहेको भन्दै त्यसबिषयमा सजग रहनुपर्ने उनिहरुले सुझाव दिएका थिए ।

मकालु टेलिभिजनका बरिष्ठ सम्बाददाता नवीन कर्णको अध्यक्षतामा वितेको फागुन २९ गते मोरङलाई कार्यक्षेत्र बनाई सक्रिय २४ सदस्यीय मैथिल संचारकर्मी संघको तदर्थ समिति गठन भएको हो । संघको उपाध्यक्षमा प्रकाश प्रेमी र महिला उपाध्यक्षमा कुमारी श्रेया रहेका छन् ।

संघको सचिवमा वीरेन्द्रकुमार साह, सहसचिवमा उषाकुमारी सरदार र कोषाध्यक्षमा राकेश कर्ण रहेका छन् । यसैगरि सदस्यहरुमा सन्तोष मेहता, शिवम मिश्र, निरज चौधरी, प्रेम यादव, प्रियंका कामत, राधा मण्डल, हुसैन शेख र पवन साह छन् ।

संघको सल्लाहकारहरुमा ब्रह्मदेव यादव, अरबिन्द मेहता, प्रवीणनारायण चौधरी, जीतेन्द्र ठाकुर, तेजलाल कर्ण, पुनम सिंह र अमलेश कर्ण छन् । नेपाल पत्रकार महासंघका पूर्व राष्ट्रिय अध्यक्ष धर्मेन्द्र झाको प्रमुख आतिथ्यमा गठन गरिएको संघमा पत्रकार बरुण मिश्रा अन्र्तराष्ट्रिय सल्लाहकारको जिम्मेबारी ग्रहण गरेका छन् । नवगठित संघका पदाधिकारीलाई आयोजक संस्थाका अध्यक्ष मनोजकुमार मिश्र लगायतले सम्मान गरे ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles