माधव नेपाल पक्षले कार्यकर्ता भेला नरोक्ने, बालुवाटार पनि नजाने - News Birat

माधव नेपाल पक्षले कार्यकर्ता भेला नरोक्ने, बालुवाटार पनि नजाने

न्यूज विराट

नेकपा एमालेका वरिष्ठ नेता माधवकुमार नेपाल समूहले ४ र ५ चैतका लागि बोलाएको राष्ट्रिय कार्यकर्ता भेला नरोक्ने भएको छ । बानेश्वरस्थित एक होटलमा बसेको नेपाल समूहको बैठकले ४ र ५ चैतका लागि बोलाएको राष्ट्रिय कार्यकर्ता भेला नरोक्ने निर्णय गरेको केन्द्रीय सदस्य विजय पौडेलले जानकारी दिए । यस्तै यथास्थितिमा अध्यक्ष केपी शर्मा ओलीले निम्ता गरेको चियापान कार्यक्रम र केन्द्रीय कमिटी बैठकमा पनि नजाने निर्णय नेपाल समूहले गरेको छ ।

सोमबार दिउँसो अध्यक्ष ओलीसँगको भेटपछि नेता नेपालले आफूनिकट केन्द्रीय सदस्य र सांसदलाई ब्रिफिङ गर्ने क्रममा ओली विवाद मिलाउने मुडमा नदेखिएको बताएका थिए । ओली समस्या समाधानमा केन्द्रित हुनेभन्दा पनि प्रतिक्रियात्मक बढ्ता देखिएका कारण यथास्थितिमा ओलीले निम्ता गर्ने कुनै पनि बैठकमा सहभागी नहुने निर्णय गरेको पौडेलले बताए ।

पौडेलले शिलापत्रसँग कुराकानी गर्दै अध्यक्ष ओलीले २८ फागुनको निर्णय सच्याउनुपर्ने र कमजोरीप्रति आत्मालोचित हुनुपर्ने र तीन वर्षअघिको एमालेकै अवस्थाबाट काम सुरु गर्न सहमत हुनुपर्ने लगायतका मतलाई निरन्तर राख्नुपर्ने धारणा आएका थिए । दिउँसो ओलीसँगको भेटमा नेता नेपालले तिनै एजेण्डा उठाएका थिए ।

प्रधानमन्त्रीसमेत रहेका अध्यक्ष ओलीसँगको छलफलमा वरिष्ठ नेता नेपालले २८ फागुनको निर्णय फिर्ता लिन माग गरेका थिए । तर,  अध्यक्ष ओलीले भने २८ फागुनको निर्णय फिर्ता हुन नसक्ने बताएका थिए । दुवै पक्षले आआफ्नो अडान नछोडेपछि छलफल ठोस निष्कर्षमा नपुगेरै सकिएको थियो ।

छलफलमा नेपाल समूहले पार्टीलाई एकतावद्ध बनाउन २८ फागुनमा गरेको निर्णय फिर्ता लिनु पर्ने बताएको थियो । तर , अध्यक्ष ओलीले भने तत्काल २८ फागुनको निर्णयमाथि पुनर्विचार गर्न नसकिने बताएका थिए । उनले त्यसका लागि नेपाल समूहले सर्वोच्च अदालतले एमाले र माओवादी केन्द्र ब्युँताएपछि गरेका गतिविधिबारे पनि छलफल हुनुपर्ने बताएका छन् । उनले प्रस्टै भनेका थिए, ‘त्यतातिर जाँदा १९ पन्नेतिर जानुपर्छ  ।’

बैठकमा अध्यक्ष ओलीले नेपाल समूहले ४ र ५ चैतमा बोलाएको राष्ट्रिय कार्यकर्ता भेला स्थगित गर्न आग्रह गरेका थिए । तर, नेपाल समूहले त्यसका लागि २८ फागुनको निर्णय फिर्ता लिनु पर्ने सर्त राखेको थियो ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles