मोरङ अदालत परिसरदेखि हतकडीसहित फरार दुईमध्ये एक जना थुनुवा पक्राउ - News Birat

मोरङ अदालत परिसरदेखि हतकडीसहित फरार दुईमध्ये एक जना थुनुवा पक्राउ

न्यूज विराट

विराटनगर, १२ फागुन । मोरङ अदालत परिसरदेखि हतकडीसहित फरार भएका दुई जनामध्ये एक जना थुनुवा पक्राउ परेका छन् । मोरङ अदालतमा पाँच दिनको म्याद थप भएपछि खाजा खाने बहाना बनाएर प्रहरीलाई झुक्याएर अदालत परिसरदेखि फरार भएका एक जना थुनुवा पक्राउ गरेका हुन् ।

लागूऔषध मुद्दामा सोमबार मोरङ अदालतमा म्याद थप भएपछि खाजा खाने बहाना बनाएर प्रहरीलाई झुक्याएर मोरङको कटहरी गाउँपालिका–४ का ३७ वर्षीय मुराज भनिने मनराज शेख र झापाको विर्तामोड नगरपालिका–५ का २० वर्षीय प्रकाश चौधरी फरार भएका थिए।

फरार भएकामध्ये शेख पक्राउ परेको मोरङ प्रहरी प्रमुख प्रहरी उपरिक्षक सन्तोष खड्काले जानकारी दिए । पक्राउ परेका शेखलाई जिल्ला प्रहरी कार्यालय मोरङमा ल्याएर अनुसन्धान सुरु गरेको एसपी खड्काले बताए ।

फरार भएका अर्का थुनुवाको पनि खोजी कार्य भइरहेकोले चाँडै पक्राउ पर्ने उहाँको भनाइ छ । मोरङ प्रहरी र १ नम्बर प्रदेश प्रहरी कार्यालय विराटनगरका विशेष प्रहरी टोली परिचालन भएर शेखलाई भारतको अररियादेखि पक्राउ गरेको हो ।

उनलाई मोरङको जहदा गाउँपालिको डुमरिया नाकादेखि करिब दुई किलोमिटर दक्षिण भारतमा लुकेर बसेको अवस्थामा प्रहरीले पक्राउ गरेर ल्याएको हो ।

अदालतदेखि भागेपछि शेख गाउँको छिमेकी दिदी भारतको अररीयास्थित शिला रामको घरमा लुकेर बसेको अवस्थमा प्रहरीले उनलाई पक्राउ गरेको हो । भारतीय प्रहरीसँग समन्वय गरेपछि शेखलाई नेपाल ल्याइएको छ । शेखलाई लागुऔषध नियन्त्रण ब्युरो विराटनगरको टोलीले आइतबार पक्राउ गरेर कारबाहीका लागि जिल्ला प्रहरी कार्यालय मोरङको जिम्मा लगाएको थियो ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles