विराटनगरमा कांग्रेस नेताहरुले भने–संविधानको रक्षाका लागि जनता माझ आएका हौँ - News Birat

विराटनगरमा कांग्रेस नेताहरुले भने–संविधानको रक्षाका लागि जनता माझ आएका हौँ

न्यूज विराट

विराटनगर, ३ फागुन । संविधान रक्षाका लागि आफुहरु जनतामाझ आएको नेपाली कांग्रेसका केन्द्रीय नेताहरुले बताएका छन् । नेपाली कांग्रेस मोरङले प्रदेश १ को राजधानी विराटनगरमा सोमबार आयोजना गरेको सभालाई सम्बोधन गर्दै नेताहरुले संसद पुनस्र्थापना गर भनेर सर्वोच्च अदालतलाई कांग्रेसले कहिल्यै नभन्ने स्पष्ट बताए । उनीहरुले संविधान रक्षाका लागि कांग्रेस सडकमा उत्रिएको उल्लेख गरे । सभालाई सम्बोधन गर्दे पूर्वमन्त्रीसमेत रहेका कांग्रेस नेता महेश आचार्यले एउटा मुद्दा सर्वोच्च अदालतमा र अर्को मुद्दा जनताको इजलासमा चलिरहेको बताए ।

सर्वोच्चमा मात्र होइन फैसला जनताको अदालतमा पनि हुने आचार्यको भनाइ थियो । कांग्रेसले आयोजना गरेको सभामा जनताको उपस्थितिले प्रधानमन्त्रीको कदमलाई अस्वीकृत गरिसकेको आचार्यले बताए ।

प्रधानमन्त्रीले देशका संयन्त्रलाई कम्युनिष्टीकरण गर्न प्रचण्ड र माधव नेपाल पनि उत्तिकै जिम्मेवार रहेको आचार्यले बताए । उनले सरकारले बलात्कारीलाई कारबाही गर्नुको साटो अपराधी लुकाउने काम भएको र अनियमितता गर्नेलाई बचाउने काम भएको आरोप लगाए । केन्द्रीय सदस्य अमृत अर्यालले नेकपाका दुबै समूहले भाडामा ओसारे जसरी कांग्रेसको भेलामा जनसमुदाय भेला नभएको बताउदै अब देशले कांग्रेस खोजेको बताए ।

अर्यालले कम्युनिष्टका कारण देशको अवस्था कमजोर हुँदै गएको आरोप लगाए । नेकपाभित्रको विवादले मुलुकलाई अनिर्णयको बन्दी बनाएको अर्यालको भनाई थियो । उनले सात दशक लामो नेपाली जनताको त्याग र संघर्षबाट प्राप्त संविधानलाई नेकपा नेतृत्वको सरकारले च्यातच्युत बनाएको आरोप लगाए ।

लोकतन्त्र र संविधानको रक्षाका लागि जस्तोसुकै आन्दोलन गर्न पनि कांग्रेस तयार भएको अर्यालले स्पष्ट पार्नुभयो । अर्का केन्द्रीय सदस्य तथा मोरङ व्यापार संघका पूर्व अध्यक्ष पवनकुमार सारडाले संविधान विपरीतको कदमले सबै क्षेत्रमा असर गरेको बताए ।

संसद विघटन हुँदा मुलुकमा लगानीको वातावरण खलबलिएको सारडाको भनाइ थियो । मोरङ कांग्रेसका सभापति डिगबहादुर लिम्बूले संघीय र गणतन्त्र समाप्त गर्ने दिशामा ओली सरकार लागेको आरोप लगाए । विरोधसभा अघि विराटनगरका विभिन्न स्थानबाट जुलुस निस्किएको थियो ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles