कुटानी पिसानी मिल व्यवसायी संघको छैठौँ वार्षिक साधारणसभा सम्पन्न - News Birat

कुटानी पिसानी मिल व्यवसायी संघको छैठौँ वार्षिक साधारणसभा सम्पन्न

न्यूज विराट

विराटनगर, १ फागुन । मोरङ साना घरेलु कुटानी पिसानी मिल व्यवसायी संघको छैठौँ वार्षिक साधारणसभा सम्पन्न भएको छ । शनिबार शुन्दरहरैँचा नगरपालिका–१० स्थित सामुदायीक वन उपभोक्त समितिको सभाहलमा संघको छैठौँ वार्षिक साधारणसभा सम्पन्न भएको हो ।

साधारण सभाको उद्घाटन कार्यक्रमका प्रमुख अतिथी नेपाल घरेलु तथा साना उद्योग महासंघ मोरङका अध्यक्ष चेतन निरौलाले गरेका थिए । साधारण सभाको अवसरमा शुभकामना दिँदै अध्यक्ष निरौलाले मोरङ साना घरेलु कुटानी पिसानी मिल व्यवसायी संघमा आवद्ध सम्पूर्ण व्यवसायीहरुलाई संस्थागतरुपमा निर्णय गरेर आफ्नो क्षेत्रमा रहेका कठिनाई र समस्याहरुलाई महासंघमा लिएर आउन आग्रह गर्दै महासंघले व्यवसायीहरुको आवाज सम्बन्धीत निकायसम्म पुर्याउन सहयोग गर्ने बताए ।

उनले महासंघले घरेलु तथा साना उद्योगीका समस्या समाधानका लागि नेतृत्वदायी भूमिका निभाउँदै आएकाले साना घरेलु कुटानी पिसानी मिल व्यवसायीको हक हित र समस्या समाधानका लागि महासंघ जहिल्यै उभिने प्रतिवद्धता जनाए । अध्यक्ष निरौलाले मोरङ साना घरेलु कुटानी पिसानी मिल व्यवसायी संघका हरेक गतिविधिमा महासंघको साथ रहने समेत बताए ।

कार्यक्रममा नेपाल घरेलु तथा साना उद्योग महासंघ मोरङका महासचिव एकराज ढकालले साधारणसभाको अवसरमा शुभकामना व्यक्त गर्दै जिललाभर रहेका सम्पूर्ण साना घरेलु कुटानी पिसानी मिल व्यवसायीहरु संगठित हुनुपर्नेमा जोड दिएका थिए ।

कार्यक्रममा मोरङ साना घरेलु कुटानी पिसानी मिल व्यवसायी संघका अध्यक्ष नगेन्द्रप्रसाद आचार्यले स्मार्ट विद्युत मिटर जडान कार्यले साना घरेलु कुटानी पिसानी मिल व्यवसायीलाई समस्यामा पारेको गुनासो गरे । उनले नवीकरण अवधी समाप्त भएका उद्योगहरुको घरेलु तथा साना उद्योग कार्यालयले नवीकरण नगरिदिने, कुटानी पिसानी उद्यमीहरुले उद्योग दर्ता नगरि सिंगल फेसले घरमै प्रयोग गरिने विद्युतले उद्यम सञ्चालन गरिरहेका कारणले संघमा सदस्य नबन्ने समस्या रहेको गुनासो गरे । अध्यक्ष आचार्यले कुटानी पिसानी उद्योगहरु दर्ता प्रकृयामा नआएकाले लागत मुल्य कम हुनेकारण कम मुल्यमा कुटानी पिसानी गर्दै आउनुपरेको समेत बताए ।

उनले सरकारले प्रत्येक वर्ष उद्यमीहरुको क्षमता अभिबृद्धिका लागि बजेट बिनियोजन गर्दै आएको बताउँदै मोरङ जिल्लामा चालु आर्थिक वर्षका लागि ६० लाख रुपैयाँ बजेट बिनियोजन गरेको भएपनि विश्वव्यापी महामारीका रुपमा फैलिएको कोरोना भाइरस (कोभिड–१९) का कारण सरकारले उक्त बजेट कटौती गरेपछि उद्यामीहरु लाभ लिनबाट बञ्चित हुनुपरेको गुनासो गरे ।

साधारण सभामा अध्यक्ष आचार्यले संघको वार्षिक प्रतिवेदन प्रस्तुत गरेका थिए । संघमा जिल्लाभरीका २ सय २४ जना उद्यमीहरु आवद्ध रहेको जनाइएको छ । साना घरेलु कुटानी पिसानी मिल व्यवसायीहरु छाता संस्थाको रुपमा रहेको नेपाल घरेलु तथा साना उद्योग महासंघ मोरङमा समेत आवद्ध भई मोरङ साना घरेलु कुटानी पिसानी मिल व्यवसायी संघ मार्फत महासंघसँग जनिक भएर गतिविधि सञ्चालन गर्दै आएका छन् ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles