राजनीतिक अधिकार अपहरण भए जनअदालतमा जान्छौँ : उपेन्द्र यादव - News Birat

राजनीतिक अधिकार अपहरण भए जनअदालतमा जान्छौँ : उपेन्द्र यादव

न्यूज विराट

जनता समाजवादी पार्टीका अध्यक्ष उपेन्द्र यादवले प्रधानमन्त्री ओलीले संघीयता र लोकतान्त्रिक गणतन्त्रलाई समाप्त पार्न खोजेको आरोप लगाएका छन् । बुधबार सप्तरीको महदेवा गाउँपालिकामा आयोजित विरोधसभालाई सम्बोधन गर्दै उनले यस्तो बताएका हुन् ।

पार्टीको आन्तरिक विवाद पार्टीभित्रै समाधान गर्नुपर्नेमा जोड दिँदै उनले भने ‘पार्टीभित्रको आन्तरिक विवाद मिलाउन नसकेका ओलीले प्रतिनिधिसभा विघटन गरेर तानाशाही प्रवृत्ति लाद्ने काम गरेका छन्, ओलीले लोकतान्त्रिक गणतन्त्र, संघीयता, समावेशिता समाप्त पार्न खोजेका छन् ।’

प्रतिनिधिसभा भङ्ग गर्ने अधिकार संविधानमा नभएको प्रष्ट्याउँदै अध्यक्ष यादवले प्रधानमन्त्री ओलीले स्वेच्छाचारी ढङ्गले शासनसत्ता हातमा लिएर जनताले फालिसकेका शक्तिहरूको आडमा जनताको बलिदानबाट प्राप्त उपलब्धिलाई समाप्त पार्न खोजेको बताए ।

आफूहरू सर्वोच्च अदालतको निर्णयको सम्मान गर्ने बताउँदै उनले भने ‘यदी राजनीतिक अधिकार अपहरण हुन्छ भने हामी जनताको अदालतमा जान्छौँ, जनसंघर्षबाट अधिकार प्राप्त गर्छौं ।’

प्रतिनिधिसभा विघटन भएपछिको सरकार कामचलाउ हुने विश्वव्यापी मान्यता रहे पनि कामचलाउ सरकारका प्रधानमन्त्री ओलीले निरंकुशता लादेर मन्त्रिपरिषद् विस्तार, धमाधम राजनीतिक नियुक्ति, सरुवा, बढुवालगायतका कार्य गरिरहेको अध्यक्ष यादवले बताए ।

राष्ट्रपतिसम्मले कामचलाउ सरकार नभनेर निरंकुशतालाई नै साथ दिएको बताउँदै उनले भने ‘विश्वका ठूला-ठूला तानाशाहलाई जनताले समाप्त पारेको इतिहास छ, यो तानाशाहलाई पनि जनताले चाँडै समाप्त पार्नेछन् ।’

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles