काठमाडौं, २७ पुस-देशभर पछिल्लो २४ घण्टामा ४८८ जनामा कोरोना भाइरस संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार ५ हजार ३०९ जनाको पीसीआर परीक्षण गर्दा १९२ महिला र २६९ पुरुषमा कोरोना पुष्टि भएको हो ।

आज देशभर कोरोना संक्रमण पुष्टि भएका आधाभन्दा धेरै काठमाडौं उपत्यकाका छन् । आज काठमाडौं उपत्यकामा १२९ महिला र १८५ पुरुष गरी थप ३१४ जनामा कोरोना संक्रमण पुष्टि भएको छ । स्वास्थ्य मन्त्रालयका अनुसार काठमाडौंमा २३०, भक्तपुरमा १५ र ललितपुरमा ६९ जना कोरोना संक्रमित थपिएका छन् ।

मन्त्रालयका अनुसार हाल देशभर हाल देशभर ४ हजार ३ सय ७३ जना सक्रिय संक्रमित छन् । १६३ जना कोरोना संक्रमितको आईसीयूमा र ३७ जनाको भेन्टिलेटरमा उपचार भइरहेको मन्त्रालयले जनाएको छ ।

अहिलेसम्म नेपालमा १९ लाख ८७ हजार ५५५ जनाको पीसीआर परीक्षण गर्दा २ लाख ६५ हजार २६८ जनामा कोरोना संक्रमण पुष्टि भएको छ । संक्रमितमध्ये २ लाख ५८ हजार ९६८ जना निको भएका छन् । सोमबार थप ५२७ जना डिस्चार्ज भएको मन्त्रालयले जनाएको छ ।

त्यस्तै, आज १० जनाको कोरोना संक्रमणबाट मृत्यु भएको मन्त्रालयले पुष्टि गरेको छ । योसँगै नेपालमा कोरोनाबाट मृत्यु हुनेको संख्या १ हजार ९२७ पुगेको छ । अहिले देशभर २३७ जना क्वारेन्टाइनमा छन् ।