नवनियुक्त मन्त्रीले लिए पद तथा गोपनियताको शपथ, विश्वकर्मा र दुगड हटाइए - News Birat

नवनियुक्त मन्त्रीले लिए पद तथा गोपनियताको शपथ, विश्वकर्मा र दुगड हटाइए

न्यूज विराट

काठमाडौं, १० पुस-प्रधानमन्त्री केपी शर्मा ओली मन्त्रिपरिषद्मा केहीको जिम्मेवारी हेरफेर गर्दै नयाँ मन्त्रीसमेत थप गरेका छन् । प्रतिनिधिसभा विघटनपछि प्रचण्ड-नेपाल समूहबाट मन्त्रिपरिषद्मा सहभागीहरूले राजीनामा दिएपछि रिक्त स्थानमा ओलीले नयाँ मन्त्री नियुक्त गरेका हुन् ।

पूर्वमाओवादी समूहबाट आफ्नो पक्षमा खुलेकाहरूलाई ओलीले मन्त्री बनाएका छन् । विस्तारित मन्त्रिपरिषद्का नयाँ सदस्यका रूपमा टोपबहादुर रायमाझीले उर्जा मन्त्रालयको जिम्मेवारी पाएका छन् । यता मणि थापाले खानेपानी मन्त्रालय सम्हाल्ने छन् भने प्रभु शाह दोस्रोपटक शहरी विकासमन्त्री बनेका छन् ।

प्रेम आलेले वन मन्त्रालयको जिम्मेवारी पाएका छन् भने गणेश ठगुन्नाले सामान्य प्रशासन मन्त्रालयको जिम्मेवारी पाएका छन् । यता गौरी शंकर चौधरी श्रम मन्त्री भएका छन् भने दावा लामा युवा तथा खेलकुद मन्त्री बनेका छन् । जुली कुमारी महतो महिला बालबालिका मन्त्री बनेकी छन् । विमला विश्वकर्मा उद्योग राज्यमन्त्री बनेकी छन् ।

ओलीले केहीको जिम्मेवारी हेरफेर गरेका छन् । यसअघि कानुनमन्त्री रहेकी शिवामाया तुम्बाहाम्फेलाई भूमिसुधार मन्त्रालय पठाइएको छ भने भूमिसुधार मन्त्री रहेकी पद्मा अर्याललाई कृषि मन्त्रालयको जिम्मेवारी दिइएको छ ।

यता सामान्य प्रशासन मन्त्रालयको जिम्मेवारी सम्हालेका हृदय त्रिपाठीलाई स्वास्थ्य मन्त्रालयको जिम्मा दिइएको छ भने स्वास्थ्यमन्त्री रहेका भानुभक्त ढकाललाई पर्यटन मन्त्रालयको जिम्मेवारी तोकिएको छ । महिला तथा बालबालिका मन्त्री रहेका लीलानाथ श्रेष्ठ कानुनमन्त्री बनेका छन् भने शहरी विकासमन्त्री रहेका कृष्ण गोपाल श्रेष्ठ शिक्षा मन्त्री बनेका छन् । युवा तथा खेलकुदमन्त्री जगत विश्वकर्मा र उद्योग राज्यमन्त्री मोती दुगडलाई भने ओलीले हटाएका छन् ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles