सत्तारुढ नेकपा विभाजन भई बालुवाटार र बबरमहलमा दुई पक्षमा केन्द्रीय कमिटी बैठक चलिरहँदा उपाध्यक्ष वामदेव गौतम भने भैँसेपार्टीस्थित निवासमै छन् । आफू पार्टी विभाजनको पक्षमा नरहेको भन्दै उनले दुवै बैठकमा जान अस्वीकार गरेका हुन् ।

प्रचण्ड–माधव नेपाल समूहले निवासमै पुगेर नेता गौतमलाई आफ्नो पक्षमा आउन आग्रह गरे पनि उनले निर्णय गरेका छैनन् । ७ पुसमा दुई पक्षले बैठक बसिरहँदा सचिवालयका अर्का सदस्य रामबहादुर थापा बादलसँग छलफल गरेर बसेका थिए ।

बादल भने बिहीबार बालुवाटारस्थित ओली समूहको बैठकमा सहभागी छन् । ओली समूहले गौतमपत्नी तुलसा थापालाई पार्टी केन्द्रीय कमिटी समस्य मनोनित गरेको छ । तर, उनी पनि बैठकमा सहभागी छैनन् । पद अस्वीकार पनि गरिसकेकी छैनन् ।

नेता गौतमले आफू प्रस्तावित दुवै पार्टीतर्फ नलाग्ने बताएको स्वकीय सचिव दीपक टमटाले बताए । उनले भने, ‘उहाँ अझै पनि पार्टी एकता जोगाउन सकिन्छ भन्ने भन्ने प्रयासमा हुनुहुन्छ । त्यसैले प्रस्तावित पार्टीका बैठकमा नजानुभएको हो । पार्टी औपचारिक रूपमै फुटे आधिकारिक नेकपामा जाने भन्नुभएको छ ।’

नेकपाका दुवै समूहले आफूलाई आधिकारिक दाबी गर्दै निर्वाचन आयोगमा निवेदन दिएका छन् । गौतमको सचिवालयको दाबीअनुसार, उनी निर्वाचन आयोगले आधिकारिता नटुंग्याउँदासम्म कुनै समूहमा लाग्ने छैनन् ।