कोरोनाबाट मृत्यु हुनेको संख्या १३ सय नाघ्यो, ३८३ जना भेन्टिलेटर र आईसीयूमा - News Birat

कोरोनाबाट मृत्यु हुनेको संख्या १३ सय नाघ्यो, ३८३ जना भेन्टिलेटर र आईसीयूमा

न्यूज विराट

काठमाडौं, ६ मंसिर-कोरोना भाइरस संक्रमणबाट थप ७ जनाको मृत्यु भएको छ । स्वास्थ्य तथा जनसंख्या मन्त्रालयका अनुसार पछिल्लो २४ घण्टाको अवधिमा थप ७ जनाको कोरोना संक्रमणबाट मृत्यु भएको पुष्टि भएको हो ।

योसँगै कोरोना भाइरस संक्रमणबाट मृत्यु हुनेको संख्या १३ सय नाघेको छ । कोरोना संक्रमणबाट १ हजार ३०५ को मृत्यु भएको छ । त्यसैगरी कोरोना संक्रमणबाट गम्भीर अवस्थामा पुगेका ३८३ जनाको भेन्टिलेटर र आइसीयूमा उपचार भइरहेको छ । स्वास्थ्य मन्त्रालयका अनुसार ४७ जना भेन्टिलेटरमा रहेका छन् भने ३३६ जनाको आइसीयूमा उपचार भइरहेको हो ।

पछिल्लो २४ घण्टाको अवधिमा देशभर ८ हजार १४४ जनाको पीसीआर परीक्षण गर्दा १ हजार ६७४ जनामा संक्रमण पुष्टि भएको छ । आज काठमाडौं उपत्यकामा मात्रै थप ८९९ जनामा कोरोना संक्रमण पुष्टि भएको छ । आजसम्म १६ लाख ५२ हजार ४३ जनाको पीसीआर परीक्षण गर्दा कुल २ लाख १८ हजार ६३९ जनामा कोरोना संक्रमण पुष्टि भएको मन्त्रालयले जनाएको छ ।

कुल संक्रमितमध्ये १ लाख ९३ हजार ३२५ जना निको भएका छन् । पछिल्लो २४ घण्टाको अवधिमा मात्रै २ हजार ३२३ जना निको भएको मन्त्रालयको तथ्यांक रहेको छ । देशभर २४ हजार ९ जना सक्रिय संक्रमित रहेका छन् । सक्रिय संक्रमित मध्ये १७ हजार २०६ जना होम आइसोलेसनमा रहेका छन् ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles