कार्यदलका नेताहरू ओली-प्रचण्ड भेट्दै - News Birat

कार्यदलका नेताहरू ओली-प्रचण्ड भेट्दै

न्यूज विराट
काठमाडौं, २१ कात्तिक-नेकपाभित्र विवाद चर्किदै गएपछि दोस्रो तहका केही नेताहरू सक्रिय हुने प्रयासमा लागेका छन् । नेकपा सचिवालयले गत साउनमा गठन गरेको विवाद समाधानको सुझाव कार्यदलका सदस्यहरू सक्रिय हुन लागेका हुन् । 

अध्यक्षद्वय  केपी शर्मा ओली र पुष्पकमल दाहाल (प्रचण्ड) लाई भेट गरेर उनीहरू विवाद साम्य पार्न सुझाव र दबाब दिने तयारीमा जुटेका छन् । परिणाम जे आए पनि भेटेर सुझाव दिनु राम्रो हो भन्ने लागेर भेटका लागि छलफल भइरहेको कार्यदलका सदस्य सुरेन्द्र पाण्डेले बताएका छन्।

पाण्डेले ट्वीट गर्दै भनेका छन्, ‘पार्टीभित्रको समस्यालाई मिलाउन हिजोको कार्यदलका सदस्यहरूले अध्यक्षहरूलाई भेटेर कुरा गर्ने कि भन्ने छलफल गर्दैछौँ । परिणाम जे आएपनि प्रयास भने जारी राख्नु राम्रो होला भन्ने लागेको छ ।’

गत साउनमा नेकपाले गठन गरेको कार्यदलको प्रतिवेदनकै आधारमा २६ भदौमा स्थायी समितिले नेकपाको विवाद टुंगो लगाएको थियो । आगामी दिनमा विवाद नगर्ने भनेर दुई अध्यक्षले २६ भदौलाई कट अफ डेको रूपमा पनि व्याख्या गरेका थिए ।

त्यो कार्यदलले प्रधानमन्त्रीका रूपमा पाँच वर्ष नै केपी ओलीलाई जिम्मा दिने र पार्टीको कार्यकारी अधिकार प्रचण्डमा केन्द्रीत गर्ने सुझाव दिएको थियो । त्यही सुझावका आधारमा सहमति जुटेको थियो । तर, अहिले यी दुबै सहमति कार्यान्वयन भएका छैनन् । र, नेकपाको विवाद उत्कर्षतिर लागेको छ । कार्यदलमा महासचिव विष्णु पौडेल, शंकर पोखरेल, सुरेन्द्र पाण्डे, भीम रावल, जनार्दन शर्मा र पम्फा भुसाल थिए ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles