कोरोना संक्रमणको अवस्था अनुसार कामः मन्त्री घिमिरे - News Birat

कोरोना संक्रमणको अवस्था अनुसार कामः मन्त्री घिमिरे

न्यूज विराट

विराटनगर, १५ कात्तिक–प्रदेश १ का सामाजिक विकास मन्त्री जीवन घिमिरेले कोरोना संक्रमणको अवस्था अनुसार प्रदेश सरकारले काम गरिरहेको बताएका छन् । कोरोना संक्रमणको मात्रा हेरेर प्रदेश सरकारले स्टेप चालिरहेको उनले बताए ।

विराटनगरमा प्रदेश सरकार, विराटनगर महानगरपालिका र निजी क्षेत्रको साँझेदारीमा कोशी कोभिड अस्पताल परिसरमा निर्माण भईरहेको आईसोलेसन केन्द्रको अनुगमन गर्दै मन्त्री घिमिरेले नेपालमा कोरोना संक्रमण देखापरे लगत्तै कोभिड अस्पताल निर्माण सुरु गरिएको दावी गरे । मन्त्री घिमिरेले संक्रमित बढेसँगै कोभिड अस्पतालको क्षमता विकास र प्रदेशका विभिन्न स्थानमा आईसोलेसन केन्द्रहरु थप गर्दै लगिएको बताए ।

उनले निजी क्षेत्रसँगको साँझेदारीमा अक्सिजन सहितको १ सय वेड बाहेक प्रदेश सरकारले कोभिड अस्पताल परिसरमै रहेको भवनमा विशिष्टिकृत सेवा सहितको थप १ सय वेड निर्माणको काम भइरहेको जानकारी दिए । संघीय सरकार, प्रदेश सरकार र विराटनगर महानगरपालिकाको सहयोगमा विशिष्टिकृत सेवा सहितको १ सय वेड तयार गरिने बताउँदै मन्त्री घिमिरेले निर्माण कार्य धमाधम भईरहेकाले चाँडै सञ्चालन गरिने बताए ।

विराटनगर महानगरपालिकाका मेयर भीम पराजुलीले निजी क्षेत्रबाट काम सुरु गर्दा छिटो हुने बताए । उनले अक्सिजन सहितको वेड तत्काल आवस्यक भएकाले सरकारी प्रकृयामा ढिलो हुने भएकाले निजी क्षेत्रसँगको साँझेदारीमा काम सुरु गरिएको उनले बताए ।

उनले महानगर क्षेत्रमा संक्रमण बढ्दै गएकाले स्वास्थ्य सुरक्षा अपनाउन आग्रह गरे । नागरिक केयर सेन्टरका संयोजक एवम् उद्योगी पवन सारडाले तिहार अगावै अक्सिजन सहितको वेड सञ्चालनका लागि काम भइरहेको बताए । सरकारले थप वेडको आवस्यकता महसुस गरेको खण्डमा त्यसका लागि नागरिक केयर सेन्टर तयार रहेको उनले जानकारी दिए ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles