विराटनगर, ३० असोज–प्रदेश १ मा भेन्टिलेटरको अभाव भइरहेका बेला पूर्व संघिय मामिला तथा सामान्य प्रशासन मन्त्री लालबाबु पण्डितको पहलमा विराटनगरस्थित कोशी अस्पताललाई ४ वटा भेन्टिलेटर प्रदान गरिने भएको छ । पूर्वमन्त्री पण्डितको पहलमा ताईवानको ‘टिजुची फाउण्डेसनले’ नेपालको ‘हेल्थ इन्भाइरोमेन्ट एण्ड क्लाइमेट एक्सन फाउण्डेसन नेपाल’ संस्था मार्फत उच्च गुणस्तरको चार वटा भेन्टिलेटर प्रदान गर्न लागेको हो ।

‘हाई फ्लो ह्युमिडिफर’ नामक उच्च गुणस्तरको भेन्टिलेटर हस्तान्तरणका लागि ३ वटा काठमाडौंबाट विराटनगर ल्याइँदै गरेको र थप एउटा भेन्टिलेटर ताइवानबाट आउने क्रममा रहेको नेकपा १ नं. प्रदेश कमिटी सदस्य सत्यनाराष्यणन चौधरीले जानकारी दिए । नेता चौधरीले उक्त भेन्टिलेटर शनिबार विराटनगरमा आइपुग्ने र सोहि दिन पूर्वमन्त्री पण्डितले वितरण गर्ने कार्यक्रम रहेको बताए ।

पछिल्लो समय जटिल प्रकृतीको लक्षण भएका संक्रमितको संख्या बृद्धि हुँदै गएका कारण प्रदेश १ का आईसियु, भेन्टिलेटरसहितका बेड अभाव हुँदै गएको छ । सोही अभावलाई मध्यनजर गर्दै पूर्वमन्त्री पण्डितले भेन्टिलेटरका लागि ताईवानको ‘टिजुची फाउण्डेसन’ सँग पहल गरेका थिए । उक्त भेन्टिलेटरले संक्रमितको उपचारमा ठुलो सहयोग पुग्नेछ ।