नेकपा सचिवालय बैठक अन्यौलमा - News Birat

नेकपा सचिवालय बैठक अन्यौलमा

न्यूज विराट
काठमाडौं, १७ असोज-आज दिउँसो चार बजे बस्ने भनिएको नेकपाको सचिवालय बैठक अनिश्चित भएको छ । दुई अध्यक्षको सचिवालयबाट दुईथरी कुरा बाहिर आएपछि बैठक अनिश्चित भएको हो । 

शुक्रबार नेकपाका दुई अध्यक्ष केपी ओली र प्रचण्डबीचकाे भेटपछि आज सचिवालय बैठक बस्ने भनिएको थियो । दुई अध्यक्षको भेटपछि शनिबार ४ बजे बैठक बस्ने प्रचण्ड सचिवालयबाट समाचार बाहिरियो । तर, शुक्रबार साँझ नै सचिवालयका सदस्यले बैठकबारे अनभिज्ञता प्रकट गरिरहेका थिए ।

प्रचण्डका प्रेस सल्लाहकार विष्णुप्रसाद सापकोटा जुगलका अनुसार शुक्रबार नेकपाको सचिवालय बैठक ४ बजे बस्ने समाचार बाहिरिएको थियो । तर, अर्का अध्यक्ष ओलीको सचिवालयले भने बैठकबारे अनभिज्ञता प्रकट गरिरहेको छ ।

नेकपा स्रोतका अनुसार अहिलेसम्म सचिवालय सदस्यलाई बैठकबारे खबर गरिएको छैन । र, प्रधानमन्त्री तथा अध्यक्ष ओलीको दैनिक कार्यक्रमको सूचीमा पनि परेको छैन ।

१५ असोजको मन्त्रिपरिषद् बैठकले मुख्यसचिव शंकरदास वैरागी, बेलायतको राजदूतमा लोकदर्शन रेग्मी र अमेरिकाको राजदूतमा युवराज खतिवडालाई सिफारिस गर्ने निर्णयले नेकपामा थप तनाव बढाएको छ ।

राजनीतिक नियुक्तिमा पार्टीमा छलफलपछि मात्रै गर्ने पूर्वसहमति विपरीत ओलीले मन्त्रिपरिषद्बाट निर्णय लिएपछि अर्का अध्यक्ष प्रचण्ड र नेता माधव नेपाल असन्तुष्ट छन् ।

सोही असन्तुष्टि जनाउन १६ असोज विहानै प्रचण्ड बालुवाटार पुगेका थिए । त्यही भेटमा १७ असोजमा सचिवालय बैठक बस्ने निर्णय भएको समाचार आएको थियो ।

मा प्रकाशित

यसमा तपाईको मत:

© Copyright 2017 - 2022 Newsbirat pvt ltd. All Rights Reserved.

Design / Developed by codebundles