विराटनगरमा प्रदेशसभाको आफ्नै भवन निर्माण कार्य सुरु - News Birat

विराटनगरमा प्रदेशसभाको आफ्नै भवन निर्माण कार्य सुरु

न्यूज विराट

विराटनगर, १ असोज–प्रदेशसभा गठन भएको झण्डै अढाई वर्षपछि प्रदेश १ प्रदेशसभाले आफ्नै भवन निर्माण कार्य सुरु गरेको छ । बिहीबार साविकको जिल्ला समन्वय समिति परिसरमै प्रदेशसभाको नयाँ भवनको शिलान्यास गरिएसँगै प्रदेशसभाको भवन निर्माण कार्य सुरु भएको हो।

जिल्ला समन्वय समितिको साँघुरो भवनमा बैठक सञ्चालन हुँदै आएको प्रदेशसभाको अब बस्ने सातौैं बैठक नयाँ सुविधासम्पन्न भवनमा सञ्चालन हुने भएको छ । योसँगै प्रदेशसभालाई इटहरी वा अन्यत्र सार्ने प्रयत्न पनि अन्त्य भएको छ । दुई वर्ष अगाडि सोहि स्थानमा भवन निर्माणको तयारी भएकोमा सांसदहरुले हस्ताक्षर संकलन गरि विरोध जनाएपछि काम रोकिएको थियो ।

प्रदेश १ को स्थायी राजधानी तोक्दा विराटनगर भएपनि राजधानीका संरचना विराटनगर, इटहरी र सुन्दरहरैचा आसपासको क्षेत्रमा रहने उल्लेख गरिएको थियो । जसको कारण प्रदेशका संरचना विराटनगर रहने कि नरहने निश्चित थिएन । प्रदेशका मुख्यमन्त्री शेरधन राई र सभामुख प्रदिपकुमार भण्डारीले प्रदेशसभा इहटरी सार्न खोजेको आरोप लागिरहेको थियो ।

प्रदेशसभाका सांसदहरुले पनि राजधानी विराटनगर भएपनि संरचना अन्यत्र बन्ने बताउँदै आएकोमा प्रदेशसभा भवन शिलान्यास भएको हो । प्रदेश सरकारले विनियोजन गरेको ५ करोड रुपैयाँ बजेटमध्ये २ करोड ५१ लाख ८१ हजार ९७६ रुपैयाँ लागतमा निर्माण हुने भवन शिलान्यास भएको हो ।

भवन शिलान्याससँगै प्रदेशसभाका सभामुख प्रदिपकुमार भण्डारीले प्रदेशसभा कुन ठाउँमा रहन्छ भन्ने विवाद अन्त्य भएको बताए । बैठक सञ्चालन गर्न अहिलेको हल साँघुरो हुँदा समस्या भइरहेकोमा भवन निर्माणपछि सहज हुने उनको बताए । प्रदेश सरकारले आफ्नो लगानीमा प्रदेश सरकारका लागि पहिलो पटक भौतिक संरचना निर्माण थालेको प्रदेश सरकारका प्रवक्ता एवम् आन्तरिक मामिला तथा कानूनमन्त्री हिक्मतकुमार कार्कीले बताए ।

मा प्रकाशित

यसमा तपाईको मत:

© Copyright 2017 - 2022 Newsbirat pvt ltd. All Rights Reserved.

Design / Developed by codebundles