अध्यक्षद्वयकाे प्रस्तावमाथि छलफल जारी - News Birat

अध्यक्षद्वयकाे प्रस्तावमाथि छलफल जारी

न्यूज विराट
काठमाडौं, २६ भदौ-बालुवाटारमा जारी नेपाल कम्युनिस्ट पार्टी (नेकपा) स्थायी कमिटी बैठकमा केहीबेर बसेर अध्यक्ष एवं प्रधानमन्त्री केपी ओली बाहिरिएका छन् । झण्डै डेढ महिनाअघि स्थगित बैठक अध्यक्षद्वय ओली र पुष्पकमल दाहाल प्रचण्डको संयुक्त अध्यक्षतामा बिहिबार बिहान ११ बजेदेखि सुरु भएको थियो । 

अर्का अध्यक्ष प्रचण्डलाई छलफल अघि बढाउन आग्रह गर्दै ओली बैठक कक्षबाट बाहिरिएको बालुवाटार स्रोतले बतायो । स्थायी कमिटीमा अध्यक्षद्वयले पेस गरेको प्रस्तावमाथि अहिले छलफल भइरहेको छ ।

नेकपाभित्र अध्यक्षद्वय ओली र प्रचण्ड–माधव नेपाल समूहबीच विवाद उत्कर्षमा पुगेपछि १३ साउनमा स्थगित बैठक बस्न सकेको थिएन् । पार्टीभित्रका विवाद समाधान गर्न महासचिव विष्णु पौडेलको संयोजकत्वमा गठिन ६ सदस्यीय कार्यदलले ६ भदौमा प्रतिवेदन बुझायो । त्यसैका आधारमा अध्यक्ष द्वय ओली र प्रचण्ड समझदारीमा आएका छन् । अध्यक्षद्वयले प्रस्तुत गरेको प्रस्ताव पारित गर्दै सम्भवतः शुक्रवारै स्थायी कमिटी बैठक सम्पन्न हुने प्रधानमन्त्रीका प्रेस सल्लाहकार सूर्य थापाले बताए ।

स्थायी कमिटीका सदस्यलाई पठाइएको प्रस्तावमा पार्टी एकताको महत्वलाई आत्मसात् गर्ने, पार्टीमा पद्धति र संस्थागत प्रणालीलाई सबल तुल्याउने, अध्यक्षद्वयको कार्यविभाजन तथा कार्याधिकार स्पष्ट गर्ने, पार्टी एकताका बाँकी काम सम्पन्न गर्नुपर्ने उल्लेख गरिएको छ ।

मा प्रकाशित

यसमा तपाईको मत:

© Copyright 2017 - 2022 Newsbirat pvt ltd. All Rights Reserved.

Design / Developed by codebundles