विराटनगर, ३२ साउन|प्रदेश १ को राजधानी विराटनगरमा शंकास्पद व्यक्तिहरुको कोरोना परिक्षणका लागि स्वाव संकलन कार्य रोकिएको छ । समुदायमै कोरोना संक्रमण फैलिएको विराटनगर महानगरपालिकामा शंकास्पद व्यक्तिहरुको पिसिआर परीक्षण गर्न स्वाब संकलन गर्ने काम नै अबरुद्ध भएको हो ।

कोरोना परीक्षणको लागि स्वाब संकलन कार्यमा खटिने एक चिकित्सकमा आइतबार कोराना संक्रमण पुष्टि भएपछि स्वाब संकलन कार्य नै रोकिएको हो । स्वाब संकलनमा खटिने चिकित्सकमा नै कोरोना देखिएपछि तत्कालका लागि स्वाब संकलन कार्य अघि बढ्न नसकेको महानगरका जनस्वास्थ्य महाशाखा प्रमुख रमेश कार्कीले बताए ।

चिकित्सकमा ज्वरो आउनेलगायत कोरोनासँग मिल्दोजुल्दो लक्षण देखिएपछि स्वाब संकलन गरेर परीक्षण गर्दा कोरोना पोजिटिभ देखिएको हो । चिकित्सकमा कोरोना देखिएपछि स्वास्थ्य महाशाखाका कर्मचारी क्वारेन्टाइनमा बसेका छन् । उनीहरुको कोरोना परीक्षण गराएर रिपोर्ट आएपछि मात्र स्वाब संकलनको काम सुरु गरिने महानगरपालिकाले जनाएको छ ।