विराटनगर, साउन ३२–कोरोना सर्ने डरले कोही पनि छिमेकी र आफन्त नआएपछि विराटनगरमा एक ८७ वर्षीय महिलाको शव नेपाली सेनाले व्यवस्थापन गर्ने भएको छ ।

विराटनगर–की एक मृतक शनिबार मृत्यु भएपनि कोरोना रिपोर्ट नेगेटिभ आएको छ । आइसोलेसनमा रहेका उनका छोरा, बुहारी र नातिको रिपोर्ट भने पोजिटिभ आएको छ । सोही डरले कुनै छिमेकी आएर लाश नउठाएपछि नेपाली सेनाले शव व्यवस्थापन गर्ने भएको हो ।

वडाध्यक्ष विनोद बस्नेतका अनुसार संक्रमित छोरा धनकुटाको पशुपंक्षी तथा मत्स्य विकास निर्देशनालयका अधिकृत हुन् । अर्का छोरा र बुहारी १० दिनअघि आमा भेट्न काठमाडौंबाट विराटनगर आएका थिए । उनीहरू ३ दिनअघि काठमाडौं फर्किएका छन् । उनीहरूलाई पनि ज्वरो आएको बताइएको छ । उनिहरुले कोरोना परीक्षणका लागि स्वाब दिएका छन् ।

महिलाको मृत्यु शनिवार राति भएको हो। उनी मुटु र थाइराइडको रोगबाट ग्रस्त थिइन्। आइतवार ३ बजेसम्म पनि उनको शव ओछ्यानमै छ । एक छोरा, बुहारी र नाति महानगरको आइसोलेसनमा छन्। अर्का एक नाति दाँतका डाक्टर हुन्।

मृतक महिलामा स्वाशप्रश्वास र ज्वरोको समस्या भए पनि उनको रिपोर्ट नेगेटिभ आएको वडाध्यक्ष बस्नेतले बताए। यही श्वासप्रश्वास र ज्वरोका कारण उनको मलामी जान कोही नआएका हुन्। मोरङका प्रमुख जिल्ला अधिकारी कोशहरि निरौलाका अनुसार घरका सबैजसो संक्रमित भएपछि शवको जिम्मा नेपाली सेनालाई दिन लागिएको हो ।