विराटनगर, साउन ३२, प्रदेश १ मा एक दर्जन पत्रकार तथा सञ्चारकर्मी कोरोना संक्रमित भएका छन् । आइतबार थप एक पत्रकारमा पुष्टि भएसँगै संक्रमित पत्रकार तथा सञ्चारकर्मीको  संख्या १२ पुगेको हो ।

अहिलेसम्म फ्रन्टलाईनमा रहेर रिपोर्टिङ गर्दै आएका ९ जना पत्रकार र सञ्चार माध्यममा काम गर्ने ३ कर्मचारीमा कोरोना संक्रमण पुष्टि भएको नेपाल पत्रकार महासंघ प्रदेश–१ का अध्यक्ष विक्रम लुइटेलले जानकारी दिए ।

अध्यक्ष लुइटेलका अनुसार संक्रमित अधिकांश सञ्चारकर्मी प्रदेश राजधानी विराटनगरका हुन् । संक्रमितमध्ये उदयपुरका १ पत्रकार कोरोना मुक्त भएर डिस्चार्ज भइसकेका छन् ।

संक्रमण पुष्टि भएका मध्ये दुई जना पत्रकार होम आइसोलेसन र अन्य विराटनगर महानगरपालिकाले बैजनाथपुर, र मारवाडी सेवा सदनमा बनाएको आइसोलेसनमा उपचाररत रहेको महासंघ अध्यक्ष लुइटेलले जानकारी दिए ।

उनले पत्रकारको सुरक्षा र कोरोनाबाट प्रभावित पत्रकारका लागि पहल गरिँदै आएको बताए । प्रदेश पत्रकार महासंघ मार्फत पत्रकारहरुका लागि विभिन्न समयमा स्वास्थ्य सामग्रीहरु वितरण, संक्रमित पत्रकारको उपचारका लागि समन्वय, कोरोना परिक्षणलगयातमा समन्य गरिएको अध्यक्ष लुइटेलको भनाइ छ ।

हालसम्म कोरोनाबाट प्रभावित पत्रकारको राहतका लागि प्रदेश सरकारसँग समन्वय गरेर प्रदेश १ का सञ्चार माध्यामहरुलाई करिब ५३ लाख रुपैयाँ वितरण गरिसकिएको उनले बताए । अध्यक्ष लुइटेलले अब कोरोनाबाट प्रभावित १०० जना पत्रकारलाई लेखनबृत्ति प्रदान गर्न लागिएको समेत जानकारी दिए ।