विराटनगर, साउन २०–विराटनगर स्थित कोशी अस्पतालको आइसोलेशनमा भर्ना हुने क्रममा मंगलबार विहान मृत्यु भएका उदयपुरको बेलकाका बेदप्रसाद न्यौपानेमा कोरोना नभएको पुष्टि भएको छ ।

श्वासप्रश्वासमा समस्या र ज्वारो आएपछि विराटनगरको विराट मेडिकल कलेजमा आएका उनलाई कोरोना संक्रमण भएको आशंकामा कलेजले भर्ना नलिएपछि कोशी अस्पताल आउँदा भर्ना हुन नपाई मृत्यु भएको थियो ।

मृत्युपछि स्वाब संकलन गरेर कोरोना परीक्षण गर्दा नेगेटिभ देखिएको कोशी अस्पतालकका मेडिकल सुपरिटेन्डेन्ट डा.चुमनलाल दासले जानकारी दिए । बेलका नगरपालिका–१ का ५५ वर्षीय न्यौपानेको मंगलबार बिहान मृत्यु भएको थियो ।

ज्वरो आउने, रिँगाटा चल्ने, वाकवाकी लाग्ने, श्वास फेर्न गाह्रो हुनेलगायत कोरोनासँग मिल्ने लक्षण देखिएकोले उनमा कोरोना भएको आशंका गरिएको थियो । उनको रिपोर्ट नगेटिभ आएर कोरोना संक्रमण नभएको पुष्टि भएपछि शव परिवारका सदस्यलाई जिम्मा लगाइएको अस्पतालले जनाएको छ ।

सोमबार दिउँसो कोशी कोरोना संक्रमणबाट अस्पतालमै मृत्यु भएका विराटनगर–५ घर भएका ७७ वर्षीय वृद्धकी श्रीमतीको पनि कोरोना रिपोर्ट नेगेटिभ आएको छ । श्रीमानलाई लिएर अस्पताल आएकी ६८ वर्षीया महिलाको मंगलबार कोरोना जाँच गर्दा नेगेटिभ रिपोर्ट आएको हो । रिपोर्ट नेगेटिभ आएका कारण सुरक्षितसाथ ‘होम क्वारेन्टाइन’मा बस्नेगरी उनलाई पठाइएको अस्पतालले जनाएको छ ।