गत १३ साउनबाट भेट नभएका यी २ नेताबीच हिजोबाट मात्र संवाद सुरु भएको हो । १ सातापछि भेटघाटमा उत्रिएका यी २ नेताको भोलि फेरि भेट हुने सहमतिलाई नै नेकपा वृत्तमा यतिबेला महत्त्वपूर्ण सहमतिका रूपमा व्याख्या गरिन थालेको छ ।

ओली सचिवालयका अनुसार २ अध्यक्षबीच बिहान भएको छलफल सकारात्मक छ । ‘छलफल सकारात्मक छ, भोलि फेरि भेटेर थप छलफल गर्ने भनेर आजको भेट सकिएको हो’, ओली सचिवालयका एक कर्मचारीले भने । प्रचण्ड सचिवालयले पनि ओली सचिवालयले दिएकै जस्तो जानकारी दिएको छ ।

ओलीले अध्यक्ष र प्रधानमन्त्री दुवै पद छाड्नुपर्ने प्रचण्ड र वरिष्ठ नेताद्वय झलनाथ खनाल र माधव नेपालको अडान छ भने ओली नछाड्ने अडानमा छन् ।

यही अडानका कारण पार्टीको स्थायी कमिटी बैठक अवरुद्ध छ भने केन्द्रीय कमिटी बैठक बाेलाएर समस्या हल गर्न माग पनि उत्तिकै बलियो गरी उठिरहेको छ ।