काठमाडौं, ७ साउन-स्वास्थ्य तथा जनसंख्या मन्त्रालयले लकडाउन खुले पनि कोरोना भाइरस (कोभिड-१९)को जोखिम नघटेको जनाएको छ । स्वास्थ्य मन्त्रालयका प्रवक्ता डा. जागेश्वर गौतमले सरकारले लकडाउनलाई हटाएर सन्त्रासमा रहेको जनजीवनलाई सामान्य अवस्थामा ल्याउन प्रयास गरेको भए तापनि जोखिम भने नघटेको बताएका हुन् ।

‘सरकारले कोभिड-१९ को महामारीको सन्त्रासमा रहेको जनजीवनलाई विस्तार नवसामान्यीकरण गर्ने सन्दर्भमा सरकारले बन्दबन्दी हटाएर विभिन्न क्रियाकलापलाई विस्तारै-विस्तारै सञ्चालनमा ल्याउने निर्णय गरेको छ,’ उनले भने, ‘यसलाई हामीले कोरोनाको महामारी सकिएको भनेर नबुझिदिनुहुन सबैमा अनुरोध छ । जोखिम अझै धेरै छ ।’

विश्वमा अरू देशले पनि त्रुटि गर्दा ठूलो जनधनको क्षति भएको उनले उल्लेख गरे । उनले सामान्य गल्तीहरूले पनि ठूलो जोखिम निम्तिन सक्ने भन्दै सबै सचेत हुन आग्रह गरेका छन् । सबै नेपालीले दुःख, कष्ट सहेर कोरोना संक्रमणलाई न्यून गर्न पाइरहेको सफलतालाई कायम राख्न सुझबुझ र धैर्यताको अरू धेरै खाँचो रहेको उनले औँल्याए ।