काठमाडौं, १३ असार-नेपालमा पछिल्लो २४ घण्टाको अवधिमा ५५४ जना कोरोना संक्रमित थपिएका छन् । स्वास्थ्य मन्त्रालयको नियमित पत्रकार सम्मेलनमा प्रवक्ता डा. जागेश्वर गौतमले नेपालमा थप १२० जना महिला र ४३४ जना पुरुषमा कोरोना पुष्टि भएको जानकारी दिए ।

योसँगै नेपालमा कोरोना संक्रमितको संख्या १२ हजार नाघेको छ । पछिल्ला २४ घण्टामा थपिएका ५५४ जना कोरोना संक्रमितसहित नेपालमा हालसम्म १२ हजार ३०९ जनामा कोरोना भाइरस संक्रमण पुष्टि भएको स्वास्थ्य मन्त्रालयले जनाएको छ ।

कोरोना संक्रमितमध्ये महिला भन्दा पुरुष बढी रहेका छन् । मन्त्रालयको तथ्यांकअनुसार हालसम्म १ हजार ३६९ जना महिला र १० हजार ३६९ जना पुरुषमा कोरोना पुष्टि भएको छ ।

पछिल्लो २४ घण्टाका अवधिमा १८ महिलासहित १३६ जनाले कोरोना भाइरसलाई जितेर डिस्चार्ज भएका छन् । जसमा ११८ जना पुरुष रहेका छन् । योसँगै नेपालमा डिस्चार्ज हुनेको संख्या २ हजार ८३४ पुगेको छ । जसमा २४२ जना महिला रहेका छन् भने २ हजार ५९२ जना पुरुष रहेका छन् ।

स्वास्थ्य मन्त्रालयको विवरणअनुसार पछिल्लो २४ घण्टाको अवधिमा  ४ हजार ६०६ नमुनाको पीसीआर विधिबाट परीक्षण गरिएको छ भने ३ हजार ६८५ जनाको आरडीटी विधिबाट परीक्षण गरिएको छ । त्यस्तै, ६५ हजार ७१२ जना देशका विभिन्न स्थानमा रहेका क्वारेन्टाइनमा रहेका छन् । ९ हजार ४४७ जना आइसोलेसनमा उपचार गरिरहेका छन् ।