काठमाडौं, ११ असार-संघीय मामिला तथा सामान्य प्रशासन मन्त्रालयले संशोधित निशान छाप प्रयोग गर्न मातहतका निकायलाई पत्राचार गरेको छ ।यसअघि गृह  मन्त्रालयले काटेको पत्रका आधारमा बिहीबार संघीय मामिला तथा सामान्य प्रशासन मन्त्रालयले सबै स्थानीय तह, सबै जिल्ला समन्वयन समिति, विभाग, आयोजना, प्रतिष्ठान तथा निकायलै परिपत्र पठाएको हो ।

नेपालको संविधानमा भएको दोस्रो संशोधनबाट नेपालको निशान छाप संशोधित भएको अवगत गराउँदै निशान छाप प्रयोग हुने सम्पूर्ण लिखित पत्राचार, सूचना, वेबसाइट र अन्य काम कारबाहीमा संशोधित निशान छाप प्रयोग गर्न आग्रह गरिएको छ । संशोधित निशान छाप प्रयोग गर्न ५ असारमा गृह मन्त्रालयले मन्त्रीस्तरीय निर्णय गरेको थियो ।

संशोधित निशान छाप ४ असारमा राजपत्रमा प्रकाशन गरिएको थियो । संशोधित निशान छापमा नेपालको कालापानी, लिपुलेक र लिम्पियाधुराको क्षेत्र समेटिएको छ ।