काठमाडौं, १० असार-त्रिभुवन अन्तर्राष्ट्रिय विमानस्थलमा आज पनि एकै दिन आन्तरिक र अन्तर्राष्ट्रिय गरी २४ उडान भएका छन् । ती उडानमध्ये अन्तर्राष्ट्रियतर्फ सर्वाधिक १४ उडान भएको विमानस्थल कार्यालयले जनाएको छ । आन्तरिकमा पनि आज १० उडान भएका छन् ।

मङ्गलबार पनि अन्तर्राष्ट्रियतर्फ १४ उडान भएको थियो । यी सबै उडान यात्रु चार्टर्ड तथा कार्गो हुन् । विभिन्न मुलुकबाट उद्धार उडानमार्फत् आज १ हजार २ सय भन्दा बढी नेपाली स्वदेश फर्किएका छन् । विभिन्न एयरलाइन्सले विदेशमा अलपत्र परेका नेपालीलाई धमाधम चार्टर्ड उडान गरी काठमाडौं ल्याइरहेका हुन् ।

आज नेपाल वायुसेवा निगम (नेपाल एयरलाइन्स) ले जेधाहबाट २ सय २५ यात्रु र एक शव नेपाल ल्याएको छ । सोही एयरलाइन्सको जहाजले जापानको नारिताबाट १९ यात्रु ल्याएको छ । पुनः कुवेतबाट नेपाली ल्याउन त्यसतर्फ उडेको विमानस्थलले जनाएको छ ।

त्यस्तै, हिमालय एयरलाइन्सले कुवेतबाट १ सय ५५, अबुधाबीबाट २ उडान गरी क्रमशः १ सय ४९ यात्रु, ३ बच्चा र २ यात्रु, दमामबाट १ सय ५४ र दोहाबाट २ सय ८२ यात्रु काठमाडौं ल्याएको छ ।

श्री एयरलाइन्सले म्यान्माको यंगुनबाट नौ यात्रु र एक बच्चा ल्याएको छ भने दोस्रो चार्टर्ड उडानका लागि उक्त एयरलाइन्स म्यान्मा उडेको विमानस्थलले जनाएको छ ।

टर्किस एयरलाइन्सले स्तान्बुलबाट २ चार्टर्ड उडानमा क्रमशः २८० र २८२ यात्रु काठमाडौं ल्याएको छ । त्यसैगरी मलेसियन एयरलाइन्सले क्वालालम्पुरबाट २ उडानमा क्रमशः ७ र ४ नेपालीको उद्धार गरी काठमाडौं ल्याएको छ । बिहीबार पनि अन्तर्राष्ट्रियतर्फ १३ उडान हुने कार्यतालिका सार्वजनिक गरेको छ । दोहा, दमाम, यङ्गुन, अबुधाबी, बहराइन, क्वालालम्पुर र जापानको नारितामा चार्टर्ड उडान हुने विमानस्थलद्वारा जारी विज्ञप्तिमा उल्लेख छ ।

आन्तरिकतर्फ विभिन्न एयरलाइन्सका १० उडान भएका छन् । मनाङ र सिम्रिक एयरका हेलिकोप्टरले ओखलढुङ्गा, सोलुखुम्बु, वीरगञ्ज र गोर्खामा उडान भरेका छन् भने तारा एयरको जहाजले नेपालगञ्जमा २ उडान गरेको छ । रासस