काठमाडौं, १० असार-पछिल्लो २४ घण्टाको अवधिमा देशभर ६२९ जनामा कोरोना संक्रमण पुष्टि भएको छ । स्वास्थ्य मन्त्रालयको नियमित पत्रकार सम्मेलन प्रवक्ता डा. जागेश्वर गौतमले भक्तपुरकी १ महिलासहित ६२९ जनामा कोरोना संक्रमण देखिएको बताएका हुन् ।

बुधबार संक्रमण पुष्टि भएकाेमा ११० जना महिला छन् भने ५१९ जना पुरुष छन् । योसँगै नेपालमा कोरोना भाइरस संक्रमितको संख्या १० हजार ७२८ पुगेको छ ।

पछिल्लो २४ घण्टाको अवधिमा ८ महिला र १०६ पुरुषसहित ११४ जना कोरोना भाइरसलाई जितेर डिस्चार्ज भएका छन् । अहिलेसम्म १९७ महिला र २ हजार १४१ पुरुष गरी २ हजार ३३८ जना कोरोना संक्रमणमुक्त भएर घर फर्किएका छन् ।

स्वास्थ्य मन्त्रालयका अनुसार ६ हजार ८२८ नमुनाको आरटी पीसीआर विधिबाट परीक्षण गरिएको छ भने १२ हजार ११२ जनाको आरडीटी विधिबाट परीक्षण गरिएको छ । त्यस्तै, देशभरका विभिन्न क्वारेन्टाइनमा बस्नेको संख्या ७८ हजार ६३९  छ भने ८ हजार ३६६ जना आइसोलेसनमा छन् ।