सुर्खेत, ७ असार-अख्तियार दुरुपयोग अनुसन्धान आयोगले तत्कालीन जिल्ला हुलाक कार्यालय दैलेखका कार्यालय प्रमुख अमरबहादुर मल्लसहित ८ जनाविरुद्ध भ्रष्टाचार मुद्दा दायर गरेको छ ।

कार्यालय कर्मचारी नियुक्ति गर्दा अनियमिता गरेको भन्दै अख्तियार दुरुपयोग अनुसन्धान आयोगले तत्कालीन जिल्ला हुलाक कार्यालय दैलेखका कार्यालय प्रमुखसहित ८ जनाबिरुद्ध मुद्दा दायर गरेको हो ।

अतिरिक्त हुलाक कार्यालयहरूमा कर्मचारी नियुक्ति गर्दा तथा कार्यालय भवन निर्माणका लागि टेण्डर गर्दा अनियमितता गरेको अख्तियार दुरुपयोग अनुसन्धान आयोगले जनाएको छ ।

तत्कालीन हुलाक कार्यालय प्रमुख मल्ल, नायब सुब्बा सन्तोष गौतम, सहायक कम्प्युटर अपरेटर गणेशबहादुर के.सी. र तत्कालीन हुलाक सेवा विभागका शाखा अधिकृत श्यामकुमार सिंहको मिलेमतोमा एक करोड ८२ लाख ६ हजार ९ सय रुपैयाँ अनियमिता गरेको पाइएको प्रवक्ता प्रदीपकुमार कोइरालाले बताए ।

‘उनीहरुले मिलेमतोमा आर्थिक वर्ष २०६९/७० मा २९९ र २०७०/७१ मा ४१२ जनाको दरबन्दी कायम गरी भ्रष्टाचार गरेको ठहर छ,’ उनले भने, ‘त्यस्तै, वास्तविक दरबन्दीभन्दा १४७ र २६० जना बढी देखाई झुट्ठा व्यहोराको गलत लिखत तयार गरेर अनियमितता गरेका हुन् ।’

आर्थिक वर्ष २०६८÷६९ मा १५२ जना कर्मचारी दरबन्दी रहेकोमा मल्लले हुलाक सेवा विभागमा पेश गरेको जिल्ला हुलाक कार्यालय, दैलेखको अतिरिक्त हुलाक अभिलेखमा २९९ जना उल्लेख गर्दै भ्रष्टाचार गरेको अख्तियार कार्यालयले जनाएको छ ।

साविक जिल्ला हुलाक कार्यालय दैलेखमा नायब सुब्बा पदमा कार्यरत रणबहादुर बोहराले जिल्ला हुलाक कार्यालय, दैलेखमा निमित्त कार्यालय प्रमुखको रुपमा कार्यरत रही २०७० सालको फागुन महिनादेखि २०७१ सालको बैशाख महिनासम्मको तलव भुक्तानी गरेको र दरवन्दी १५२ मात्र भएको भनी हुलाक सेवा विभागबाट लेखिएको पत्रसमेतलाई वेवास्ता गरी उल्लिखित तीन महिना अवधिको १४७ जना स्वीकृत दरवन्दीभन्दा बढी व्यक्तिहरुलाई तलब भत्ता भुक्तानी दिई ३० लाख ३ हजार २ सय १० बढी खर्च गरेको अख्तियारले ठहर गरेको छ ।