काठमाडौं, १ असार-कोरोना भाइरस पोजिटिभ देखिएका सबैलाई अस्पतालमा नराखिने भएको छ । स्वास्थ्य मन्त्रालयको कोरोना रेस्पोन्स प्लान अनुसार अब पोजिटिभ भएका तर लक्षण नभएकालाई घरमै राख्न लागिएको हो । यद्यपि उनीहरूको निगरानी भने गरिने छ । कोरोना संक्रमतिको संख्या ५ हजार नागेपछि यो नियम लागू गर्न लागिएको हो ।

अस्पतालमा आइसोलेसन बेड, अक्सिजन र भेन्टिलेटरको अभाव हुने भएकाले जटिल संक्रमितलाई मात्र अस्पतालमा राखिने छ । पहिलो २ हजार संक्रमितलाई लक्षण नभए पनि अस्पतालमा राखिएको थियो । कोरोना भाइरस समुदायमा फैलन नदिन २ हजारलाई अस्पतालमा राखिएको हो ।

‘रेस्पोन्स प्लान अनुसार नै काम भएको छ,’ स्वास्थ्य मन्त्रालयका सहप्रवक्ता समिरकुमार अधिकारीले भने, ‘५ हजार क्रस भएपछि जटिलता भएकालाई मात्र अस्पताल राख्ने हो । हरेक पोजिटभलाई अस्पताल नलाने भन्ने छ ।’

पोजिटभ भएका तर समान्यलाई घरमै राखिने उनले बताए । ‘२ हजारदेखि ५ हजारको बीचमा लक्षण भएकालाई मात्र अस्पताल लाने थियो ।  जटिल भएकालाई प्राथमिकता दिने हो । सामान्यलाई घरमै राखिए पनि निगरानी भने गरिन्छ ।’

कोरोना उपचारको लागि १ सय २७ कोभिड क्लिनिक छन् ।  पहिलो लेबलको अस्पतालमा १३ वटा, दोस्रो लेबलमा १२ वटा र तेस्रो लेबल ३ वटा गरी अस्पताललाई विभाजन गरिएको छ ।

सामान्य भए पहिलो लेबलमा, जटिल भए दोस्रोमा, अक्सिजन र भेन्टिलेटरको प्रयोग गर्नुपरे तेस्रो लेबलमा उपचार हुन्छ । सबै अस्पतालमा गरेर २६ हजार ९ सय ३० वडा बेड छन्, जसमा आईसीयू बेड १५ सय ९५ वडा रहेका छन् । भेन्टिलेटर ८ सय ४० वटा छन् । आइसीयू सुविधा भएका अस्पतालको संख्या १ सय ९४ छ । आइसोलेसन बेड ३ हजार ७६ वटा छन् । कोरोनाको हब अस्पताल २५ वटा तोकिएको छ । अस्पतालको संरचना अपुग हुने भएकाले सामान्यलाई घरमै राख्न लागिएको हो ।