रुकुम पश्चिम घटनाः ३४ जनाविरुद्ध मुद्दा दर्ता, थुनछेक बहस भोलि - News Birat

रुकुम पश्चिम घटनाः ३४ जनाविरुद्ध मुद्दा दर्ता, थुनछेक बहस भोलि

न्यूज विराट

सुर्खेत, ३२ जेठ-रुकुम पश्चिमको चौरजहारीस्थित सोतीमा भएको सामूहिक आक्रमणपछि हत्याको घटनामा प्रहरीले ३४ जनाविरुद्ध जिल्ला अदालत रुकुम पश्चिममा मुद्दा दर्ता गरेको छ । घटनाको आवश्यक छानबिनपछि प्रहरीले ३४ जनाविरुद्ध जिल्ला अदालत रुकुम पश्चिममा मुद्दा दर्ता गरेको हो ।

मुद्दा दर्ता गरिएकामध्ये २ जना बालबालिका छन् भने १ जनालाई मतियारको रुपमा राखिएको छ । बाँकी ३१ जनाविरुद्ध ज्यान मार्ने उद्योग, कतव्र्य ज्यान र जातीय विभेद तथा छुवाछुत कसुरमा मुद्दा दर्ता गरेको जिल्ला अदालत रुकुम पश्चिमका श्रेस्तेदार कृतबहादुर बोहरा बताए ।

‘आज मुद्दा दर्ता गरिएको र भोलिबाट थुनछेक बहस सुरू गरिने छ’, उनले भने, ‘मुद्दा लागेकामध्ये ५ जना फरार रहेका छन् भने बाँकी सबै पक्राउ परेका छन् ।’

गत १० जेठमा रुकुम पश्चिम चौरजहारी नगरपालिका-८ सोतीका स्थानीयको आक्रमणमा परेर ६ जनाको मृत्यु भएको थियो भने १२ जना घाइते भएका थिए ।

घटनामा परी भेरी नगरपालिका-११ का गोविन्द शाही, जाजरकोटको भेरी नगरपालिका-४ रानागाउँका नवराज विक, चौरजहारी नगरपालिका-१ का टीकाराम सुनार, भेरी नगरपालिका-४ का गणेश बुढा, लोकेन्द्र सुनार र सञ्जीव विकको शव भेरी नदीमा भेटिएको थियो । घटनामा संग्लन रहेका २९ जनालाई प्रहरीले पक्राउ गरेको छ ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles